Экуьн бере

Вуч азгардиз алукьзава и экуьн бере!

Умун, бере, ширин бере ва секин бере!

Цавни, чилни, гьуьлни къати ярара ава.

Вуч гаф, вуч чIал ракъинин туьнт нурара ава?

Икьван гагьда чилин винел яшамиш хьана,

Куьз ятIани сифте яз къе зун чашмиш хьана.

Ихьтин гьалда хьун мумкин я, гъейри тежез ван,

КIанзавай руш хелветдаказ акур невжаван.

За хиялна: «Йифен гъетер, зар алаз кайи,

И ялавдик акахьнава, хъийиз чеб цIийи…

Белки, зи рикI и ярарин гьатна деринда,

Белки, цIийи хъувуна вич гъетрен еринда?

Зи дуьаяр кьабул ая, эй экуьн бере!

За ви нурар-цIарар кIелна – гъана зи кьере:

«Алатай чIав фенва – ам на мийир жуваз пар,

Вилик квай чIав цав я кьакьан – гьазура гурар!»

2010

* * *

– Куьз ава вун гуьгьуьлдал циф ацукьиз?

Куь ва я ни ийизва вун сефилар?

– ЧIаларбанрин шииррин ван галукьиз,

Лезгистанда гиликьзава билбилар.

2010

* * *

Уьмуьрдин вири ваъ, амма и къанун

Гьахълу яз аквада:

Цавара зар алаз лув гайи бувун

Ацукьда лакадал.

2010

* * *

Халкьдай чIавуз лезги чIалан гафарган

Гзафарнач Халикьди сан гафарин

А чIаварин лезги чилин часпар кьван.

Къе агакьна ниятдив зун Гъуцарин:

И чилиз хас язва ахьтин гуьрчегвал –

Гаф лугьунин авач саки гереквал.

2010

* * *

Акваз-такваз уьмуьрдин пай алатна фена,

Гур йисарин карван ацIай алатна фена.

Зи шадвилер-пашманвилер, ракъар-чIимелар,

Жегьилвилин зи хаму тай алатна фена.

Вил галамаз килигна зун элкъвена кьулухъ:

Ахкунач заз затIни яргъай – алатна фена.

Зи къуьнел гъил гьалчна сада – пIир хьтин касди:

«Ахъай вилер… ЭвичI цавай… Алатна фена?..»

«Хидир яни? Вагъуф яни? Вун вуж я, буба?»

«Гьеле кьатIуз жезвач вавай… – алатна фена. –

Арбен Къардаш, рехъ давамра, – хълагьна ада. –

Такурай заз вун рекьелай алатна фена!..»

2010