Богородичные

Избранные псалмы и величания

Господские

Воздвижение Честнаго Креста

Величаем Тя, / Живодавче Христе, / и чтим Крест Твой Святый, / имже нас спасл еси // от работы вражия.

1. Суди, Господи, обидящия мя, побори борющия мя.
2. Знаменася на нас свет лица Твоего, Господи.
3. Яко оружием благоволения венчал еси нас.
Слава, и ныне: Аллилуия, аллилуия, аллилуия, слава Тебе, Боже. (2 раза)

Рождество Христово

Величаем Тя, / Живодавче Христе, / нас ради ныне плотию рождшагося / от Безневестныя // и Пречистыя Девы Марии.

1. Воскликните Господеви вся земля, пойте же Имени Его.
2. Дадите славу хвале Его. Поведите вся чудеса Его.
3. Да возвеселятся Небеса, и возрадуется земля.
4. Избавление посла людем Своим.
Слава, и ныне: Аллилуия, аллилуия, аллилуия, слава Тебе, Боже. (2 раза)

Крещение (Богоявление)

Величаем Тя, / Живодавче Христе, / нас ради ныне плотию крестившагося / от Иоанна // в водах Иорданских.

1. Боже, ущедри ны и благослови ны.
2. Просвети лице Твое на ны, и помилуй ны.
3. Приступите к Нему, и просветитеся, и лица ваша не постыдятся.
4. Море виде и побеже, Иордан возвратися вспять.
Слава, и ныне: Аллилуия, аллилуия, аллилуия, слава Тебе, Боже. (2 раза)

Сретение

Величаем Тя, / Живодавче Христе, / и чтим Пречистую Матерь Твою, / Еюже по закону ныне // принеслся еси в храм Господень.

1. Отрыгну сердце мое слово благо, глаголю аз дела моя цареви.
2. Возлюбил еси правду, и возненавидел еси беззаконие.
3. Господь во храме святем Своем: Господь на Небеси престол Его.
Слава, и ныне: Аллилуия, аллилуия, аллилуия, слава Тебе, Боже. (2 раза)

Преображение

Величаем Тя, / Живодавче Христе, / и почитаем пречистыя плоти Твоея // преславное преображение.

1. Велий Господь и хвален зело, во граде Бога нашего, в горе святей Его.
2. Посли Свет Твой и истину Твою.
3. Господи, во Свете лица Твоего пойдут; и о Имени Твоем возрадуются весь день.
Слава, и ныне: Аллилуия, аллилуия, аллилуия, слава Тебе, Боже. (2 раза)

Вознесение

Величаем Тя, / Живодавче Христе, / и почитаем еже на Небеса / с пречистою Твоею плотию // Божественное вознесение.

1. Вси языцы восплещите руками, воскликните Богу гласом радования.
2. Взыде Бог в воскликновении, Гоподь во гласе трубне.
3. Поклонитеся Ему, вси Ангели Его.
Слава, и ныне: Аллилуия, аллилуия, аллилуия, слава Тебе, Боже. (2 раза)

Троица

Величаем Тя, / Живодавче Христе, / и чтим Всесвятаго Духа Твоего, / Егоже от Отца послал еси // Божественным учеником Твоим.

1. Небеса поведают славу Божию, творение же руку Его возвещает твердь.
2. Послеши Духа Твоего, и созиждутся, и обновиши лице земли.
3. Дух Твой Благий наставит мя на землю праву.
Слава, и ныне: Аллилуия, аллилуия, аллилуия, слава Тебе, Боже. (2 раза)

Богородичные