Молитва шестая.

О Пресятая Госпоже Владычице Богородице! Со страхом, верою и любовию пред честною и чудотворною иконою Твоею припадающе, молим Тя (просьба), и не отврати лица Твоего от прибегающих к Тебе. Умоли, Милосердая Мати, Сына Твоего и Бога нашего, Господа Иисуса Христа, да сохранит мирну страну нашу, Церковь же Свою Святую непоколебиму да соблюдет, и от неверия и ересей и раскола да избавит. Не имамы бо иныя помощи, не имамы иныя надежды, разве Тебе, Пречистая Дево; Ты еси всесильная христиан Помощница и Заступница. Избави же всех с верою Тебе молящихся от падений греховных, от навета злых человек, от всяких искушений, скорбей, болезней, бед и от внезапной смерти. Даруй рабам Твоим (имена) дух сокрушения, смирение сердца, чистоту помышлений, исправление греховныя жизни и оставление прегрешений, да вси, благодарне воспевающе величия Твоя и милости Твоя являемыя зде на земли, сподобимся и Небеснаго Царствия, и тамо со всеми святыми прославим Пречестное и Великолепое Имя Отца и Сына и Святаго Духа во веки веков. Аминь.

Молитва седьмая.

Пресвятая Госпоже, Владычице Богородице! Услыши ны: (просьба), и помилуй грешныя и недостойныя рабы Твоя (имена), умоли Милосердая Владычице, Сына Твоего и Господа нашего Иисуса Христа, да отвратит от них праведный гнев Свой, да простит грехи и беззакония их, яко да сподобятся благостию Его скончати житие в покаянии и получити милость Его со всеми избранными Его: яко благословена и препрославлена еси во веки. Аминь.

Молитва восьмая.

Богорадованная Владычице, Всемилостивая о всем мире Ходатаице! Прилежно раби Твои ко Твоему предстательству прибегаем: (просьба), и молитву теплую к Сыну Твоему и Богу нашему сотвори о рабех Божиих (имена), да от всяких болезней и печалей их Тебе ради избавит, и от грехов всяких свободив, Царствия Своего Небеснаго наследники их покажет; велие бо и неизреченное, яко Мати, к Нему дерзновение имаши и вся от него испросити можеши, Едина во веки Преблагословенная. Аминь.

Молитва девятая.

О Пресвятая Госпоже, Владычице Богородице! Смиренно припадающе молим Тя: (просьба), и не затвори рабам Твоим, грешным (имена), щедрот Твоих, избави их от падения греховнаго, от навета злых человек, от скорбей и бед, от внезапныя смерти и вечных мук и даруй им дух сокрушения, смирение сердца, чистоту ума и оставление прегрешений, да вси, благодарно Тя воспевающи, сподобимся Небеснаго Царствия и тамо со всеми святыми да славим Пречестное и Великолепое имя Отца и Сына и Святаго Духа во веки веков. Аминь.