Пяточисленныя молитвы св. Димитрия Ростовскаго

Один старец от Богоносных Отцев, стоя на молитве и быв в восторге, слышал глас Господа нашего Иисуса Христа, глаголющий с Пречистою и Пресвятою Богородицею, Материю Своею, рекши к Ней:

– Рцы мне, Мати Моя, колико болезней наибольших, живущи на свете, претерпела еси Мене ради?

И рече Пресвятая:

– Сыне и Боже Мой! Наибольших пять болезней Тебе ради претерпела: первая – егда услышала от Симеона Пророка, еже имел еси убиен быти; вторая – егда ищущи Тебе во Иерусалиме через три дня, Тя не видела есмь; третья – егда Тя поймана и связана от жидов услышала; четвертая – егда Тя на кресте между разбойниками распятаго видела; пятая – егда Тя видела во гробе полагаема.

И рече к Ней Господь:

– Глаголю Тебе, мати Моя: аще кто каждую болезнь Твою на каждый день прочтет с молитвою Моею, сие есть «Отче наш», и Архангельское обрадование, сие есть, «Богородице Дево, Радуйся» – за первую болезнь дам ему познание грехов и жаление о них; за вторую – дам ему всех грехов прощение; за третью – возвращу ему добродетели его, через грехи изгибшия; за четвертую – напитаю его при смерти его, Телом и Кровию Моею Божественною; за пятую – явлюся ему Сам при смерти его и прииму душу его в живот вечный. Аминь.

По видению этому Богоносному Старцу святителем Димитрием Ростовским было сложено нижеследующее молитвословие.

Начало молитв:

Слава Тебе, Христу Богу моему, не погубившему мя грешнаго со беззакониями моими, но даже доселе грехом моим потерпевшему.

(Поклон).

Сподоби, Господи, в день сей без греха сохранитися нам. Даруй ми, Господи, да ни словом, ни делом, ни помышлением не прогневаю Тя, Создателя моего, но вся дела моя, советы и помышления да будут во славу Пресвятаго Имени Твоего.

(Поклон).

Боже, милостив буди мне, грешному, во всей жизни моей; во исходе моем и по кончине не остави мене.

(Поклон)

Затем, падши ниц на землю, говори:

Господи, Иисусе Христе, Сыне Божий, приими умершаго мя душею и умом, приими мя, грешнаго блудника, сквернаго душею и телом, отыми неприязнь безстудную и не отврати лица Твоего от мене, не рцы, Владыко: не вем кто еси, но вонми, гласу моления моего; спаси мя, яко имеяй множество щедрот и не хощеши смерти грешника. Не оставлю же Тя, Создателя моего, и не отступлю от Тебе, дондеже послушавши мя и даси всем грехом моим прощение, молитв ради Пречистыя Матери Твоея, предстательства Честных Сил Безплотных, Ангела хранителя моего, Святаго славнаго Пророка же и Предтечи Твоего, Крестителя Иоанна, Богоглаголивых Апостол, Святых и добропобедных мученик и Богоносных Отец наших и всех Твоих Святых, помилуй и спаси мя грешнаго. Аминь.

Царю Небесный, Утешителю, Душе истины, Иже везде Сый, и вся исполняли, сокровище благих и жизни подателю, прииди и вселися в ны, и очисти ны от всякия скверны, и спаси, Блаже, души наши.

Святый Боже, Святый крепкий, Святый безсмертный, помилуй нас.

(Трижды с поклонами).

Слава Отцу, и Сыну, и Святому Духу, и ныне и присно, и во веки веков, аминь.

Пресвятая Троице, помилуй нас, Господи, очисти грехи наша, Владыко, прости беззакония нашa, Святый, посети и исцели немощи нашa, имени Твоего ради.

Господи помилуй (Трижды).

Слава и ныне:

Отче наш, Иже еси на небесех, да святится имя Твое, да приидет царствие Твое, да будет воля Твоя, яко на небеси и на земли. Хлеб наш насущный даждь нам днесь, и остави нам долги нашa, якоже и мы оставляем должником нашим; и не введи нас во искушение, но избави нас от лукаваго. Яко Твое есть царство и сила и слава во веки. Аминь.

Богородице Дево, радуйся, Благодатная Марие, Господь с Тобою: благословенна Ты в женах, и благословен Плод чрева Твоего, яко Спаса родила еси душ наших.