Вопль грешной души ко Господу

Всеблагий Человеколюбче Господи, сшедший с небесе ради спасения нас грешных, услыши меня в час сей, молящегося Твоей благости, воздвигни из глубины греховныя, избави от окаянного нечувствия, прежде даже до конца не погибну, спаси мя!

Помышляя страшный час смертный, трепещет и мятется оскверненная делы лютыми душа моя! Чем оправдаться, не ведает, аще не единым милосердием Твоим. Помилуй мя, Боже, помилуй мя!

Все житие мое блудно и страшно иждих, беззакония моя превзыдоша главу мою и яко бремя тяжкое отяготеша на мне; како предстану страшному и праведному судилищу Твоему, Господи? Осквернен беззаконными деяньми; како воззрю на сонмы чистейших ангелов и всех святых? Помилуй мя, Боже, помилуй мя!

Созданный по образу и по подобию Божию, кому уподобихся, окаянный, оскверних брачную одежду души, омрачих ум и все мое естество растлих помышлениями; помилуй мя, Боже, помилуй мя!

Вижду на всяк день и час - ближние мои, друзья и сродницы, един по единому поемлются горькою смертию и отводятся в страну далекую, да восприимут кийждо по делам своим, аз же, окаянный, не подражая Давиду и иным покаявшимся, аки жестокий камень нечувствен пребываю; помилуй мя, Боже, помилуй мя!

Аще ли когда нечто по благости Твоей благое сотворю, то, подражая фарисею, возношуся и услаждаюся самохвалением, и тако вся моя благая до конца погубляю и обретаюсь наг от всякого добра, имый беззакония неисчетны: помилуй мя, Боже, помилуй мя!

Аще и на всяк час, аки скверная блудница, утопаю в делах студных и безместных, прилагая грехи ко грехам, но не страшуся Твоего страха, не боюся огня геенскаго и тьмы кромешныя и червя неусыпающаго; увы мне, жив сый, но аки мертв душою обретаюся; помилуй мя, Боже, помилуй мя!

От крайнего безумия моего за маловременную и скоропреходящую сладость греха погубляю душу бессмертную, погубляю сокровище, дражайшее всего мира, погубляю красоту, созданную по образу и по подобию Божию! О, нерассудный, окаянный, сокрушайся, болезнуй, плачь и с рыданием взывай: помилуй мя, Боже, помилуй мя!

Подражала ты, грехолюбивая душа моя, Каину братоубийце и иному Ламеху злочестивому, погубила дар Божий, осквернила всеми беззакониями, и несть таковых, яже не соделала; превзошла от века грешники и что, спрошу, уготовила себе, аще не вечное рыдание и безутешное; помилуй мя, Боже, помилуй мя!

При дверях суд твой, душе, воспряни, потщися, приими во ум твой судилище страшное, на немже обличатся вся срамная, содеянная тобою; молись тепле, принеси покаяние с болезнею сердечною, плачь, вопий, умоляй Судию, припадай к стопам Его с болезненным рыданием, исторгай слезы очистительныя, аще не умилосердится Человеколюбец Господь, и горце взывай с многим сердечным стенанием: помилуй мя, Боже, помилуй мя!

Имый попечение о душе своей да прочитывай сие на каждую среду и пяток, а усерднейший и на каждый день, особенно в Великий пост.