По 1-м стихословии седален, глас 4.

Подобен: Вознесыйся:

Земных и тленных наслаждения, и мира красоты, и пищи временныя небрегл еси, в пустыни житие возлюбив; отсюду сподобился еси мученическому и постническому лику сочетатися. С ними же моли спасти чтущия тя.

Слава, и ныне, Богородичен:

Чистая Всенепорочная и Неискусобрачная, едина Безлетнаго Сына и Слова Божия в лете рождшая, Того со святыми и честными апостолы, му­ченики, и пророки, и преподобными, моли даровати нам очищение и велию милость.

По 2-м стихословии седален, глас 4.

Подобен: Скоро предвари:

Христу последовав, мир оставил еси, и плоть покорил еси воздержанием, отче Александре, отонудуже священия помазание имел еси. Ныне же к невещественным преставился еси ликом, моля о всех нас, блажащих тя.

Слава, и ныне, Богородичен:

Едина рождшая Творца всех, едина украсившая человечество Рож­деством Твоим, Пречистая, избави мя сетейльстиваго велиара; постави мя на камени Христовых хотений, Того молящи прилежно.

По полиелеи седален, глас 3.

Подобен: Божественныя веры:

Божественным Духом просвещен, проповедал еси со дерзновением Православия предание, всеблаженне Александре, и мучителя беззаконна посрамил еси, в заточения неправедно отсылаемый, Христа Бога моли, грехов оставление подати чтущим любовию святую память твою.

Слава, и ныне, Богородичен:

Кийждо идеже спасается, тамо праведно и притекает; и кое есть иное та­ковое прибежище, яко Ты, Богородице, покрывающая души наша.

По 50-м псалме стихира, глас 6.

Преподобне отче, / во всю землю изыде вещание исправлений твоих; / тем на Небесех обрел еси мзду трудов твоих, / демонов погубил еси полки, / Ангелов достигл еси чины, / ихже житию непорочно поревновал еси; / дерзновение имея ко Христу Богу, // темже мир испроси душам нашим.

Канон, глас 6

Песнь 1.

Яко по суху пешешествовал Израиль, / по бездне стопами, / гонителя фараона/ видя потопляема, // Богу победную песнь поим вопияше.

Всемысленно Тя, Спасе, возлюби священный Александр, ко страданию приложився крепко, скорби и болезни и подвиги терпя, дондеже обрете пищу безконечную.

Кровными кроплении сланое неверствия море утолил еси, рекою быв Христовою, напаяющею воистину души наша присно.

Многия подвиги на земли принесл еси Богу, славне Александре, и Царствия Небеснаго сподобился еси венцы прияти и вечнующий живот нерушимый.

Богородичен: Украшена добротою добродетелей, Богомати Чистая, Бога Истиннаго добродетельне зачала еси, нас Божественными добродетельми просветившаго.