Спосабы лепкі. Асноўныя этапы лепкі дробнай пластыкі

Для лепкі дробнай пластыкі можна карыстацца наступнымі спосабамі:

- канструктыўны (лепка з лепка з асобных частак);

- пластычны (лепка з цэлага кавалка, усе часткі выцягваюцца);

- камбінаваны (спалучэнне канструктыўнага і пластычнага). Часам у літаратуры можна сустрэць назву “змешаны спосаб”.

Найбольш просты спосаб – канструктыўны. Скульптура ствараецца з частак, якія зляпілі загадзя. Працу пачынаюць з асноўнай, найбольш буйнай часткі. Напрыклад, пры лепцы фігуркі жывёлы спачатку лепяць тулава, потым галаву, параўноўваюць часткі па велічыні, злучаюць, далей лепяць лапкі. Дробныя дэталі лепяць у апошнюю чаргу. Работа павінна быць цэльнай, формы павінны плаўна пераходзіць адна ў адну, каб не было іх раз’яднання.

Лепка пластычным спосабам, з цэлага кавалка – спосаб больш складаны, так як патрабуе дакладных рухаў, добрага вокамера і яснага ўяўлення аб форме і прапорцыях будучага вобраза. Таму перш чым ляпіць скульптуру, трэба добра ўдакладніць яе форму, прапорцыі, пластыку. Кавалку пластычнага матэрыялу надаем зыходзячую канструктыўную форму: для сабакі будзе цыліндр, курыцы – авоід (яйкападобная форма), вавёркі – валік сагнуты ў падкову. Далей намячаем і удакладняем агульную форму, прасторавае становішча фігуры. Калі ўжо намецілася асноўная форма жывёлы, шляхам выцягвання, сціскання лепім шыю, галаву, канечнасці. Далей прапрацоўваем дробныя дэталі. У працэсе працы неабходна ўдакладняць і правяраць прапорцыі.

Камбінаваны спосаб лепкі ўключае ў сябе вышэй названыя. З цэлага кавалка лепяць тыя часткі, якія складаюць асноўную форму, масу прадмета, напрыклад, у медзведзяня можна зляпіць тулава, тоўстыя ногі, у лісы тулава, галаву, хвост. Галаву мядзведзя лепш зляпіць асобна, а ў ліскі – ногі, так як калі будзем іх ляпіць (выцягваць) з агульнага кавалка, можна парушыць форму.

Падчас лепкі дробных дэталей выкарыстоўваюцца наступныя прыёмы: скочванне, раскочванне, сплюшчванне, выцягванне, прышчыпванне, сцісканне.