Песнь 9

Ирмос: От Бога Бога Слова неизреченною мудростию пришедшаго обновити Адама, ядию в тление падшаго люте, от Святыя Девы неизреченно воплотившагося нас ради, вернии единомудренно песньми величаем.

Добро было вам не родитися, нечестивии мучители, зане отраднее будет Содому и Гоморре в День Судный, неже Святаго Царя убийцем, того молитвами, Господи, утверждай православных Веру.

Святии Новомученицы-Царевны, молите Бога о нас.

Все желание девы Святии Ольго, Татиано, Марие и Анастасие, стяжавше ко Единому Владыце, жительства красоту и славу Царствия вменисте яко сон, вопиюще, Господа пойте дела и превозносите во вся веки.

Язвы на мученическая Ваша телеса возложенная, язвы врагу спасения нашего явишася, демонов победителие, Царственнии Новомученицы блаженнии, от их же мучительства избавите души наша.

Богородичен: Ярость адова и та не возможет на ны, зане Свят есть храм Твой, и о семене Твоем клятся Давид, непрестающа хвала Твоя и Держава Твоя до скончания века.

Светилен:

Невечернему свету предстояще, Святый Царю Николае со Славным Семейством Своим, с мученическими лики, во испытаниих не оставляйте ны молитвами вашими.

Слава, и ныне, богороднчен:

Рождшая Свет Незаходимый, просвещающий седящих во тьме неведения и прелести, озари и нас, грешных, Светом Сына Твоего.

На хвалитех стихиры на 4, глас 8.

Подобен: О, преславнаго чудесе:

О, преславнаго чудесе! / Святии Царственнии Страдальцы седмочисленнии / в годину страданий за Христа / сохраниша любовь и верность Ему, / друг друга тяготы носяще / и тако исполняюще закон Его, / сего ради ныне на небеси царствуют / и дерзновенно молятся / о спасении душ наших.

О, Боговенчанный Царю Николае, / славный слуго Владыки Христа, / хранителю Церкви и защитителю, / избранный Богом Ея покровителю, / великаго Иустиниана подобниче, / вонми гласу моления нашего, / прости, защити и укрепи / заблуждших чад Твоих, / да верою и любовию прославим прославльшаго Тя.

О, преславнаго чудесе! / Святая Новомученица Царица Александра, / в горцем заточении от богоборцев бывши / и чающи смерти за Христа, / вкупе с четверицею дев мудрых, дщерей Своих, / се, Жених грядет, глаголала./ Уготовим светильники Своя, / да внидем в чертог Его / и облецемся вси одеждею славы Его.

О, благоверный Царевичу Алексие, / во смирении сердца Ты глаголал еси: / внегда Мне царствовати, / да не обрящутся нищии и убозии. / Егда же крестным путем жития Твоего/ и мученическою Твоею кончиною/ в Царство Небесное возшел еси / идеже имея дерзновение велие, / молишися о всех, требующих Твоея помощи.

Слава, глас тойже:

О Святая седмерице Царственная, / Христова похвало и славо! / Соизволением Отца Безначальнаго, / совершением Сына Единороднаго / и содействием Святаго Духа / мученицы за Веру показастеся / и Царствия Божия причастницы соделастеся. / Приимите покаяние наше / и молите Триединаго Бога / Державу нашу Российскую / в Православии и единомыслии неколеблему сохранити, / Царя нашего укрепити/и спасти души наша.

И ныне, глас тойже. Подобен: О. преславнаго чудесе:

О, преславнаго чудесе! / Небесе и земли Царица, / от святых сродников наших умоляемая, / до ныне Землю Русскую покрывает / и Лика Своего изображения милостивно обогащает. / О Владычице Державная! / Не престани и на будущее время / во утверждение на Руси Православия / милости и чудеса изливати до века. Аминь.

На литургии: