О поставлении церкви.

Отдел рукописей БАН

Житие Пахомия Нерехтского.

17.5.30

Л. 17) Месяца марта в 21 день житие и жизнь и преставление преподобнаго отца нашего Пахомия игумена монастыря Пресвятые и Живоначалнные Троицы, иже во области града Костромы близ Нерехты на месте, нарицаемом на Сыпанове, благослови, отче.

Благословен Господь Бог отец Господа Нашего Исуса Христа, сотворивый небо и землю и сопный море словом повеления своего, и преведе от небытия в бытие, и создавый человека по образу своему и подобию. Бог благ и славу//(л. 17 об.) дасть и смыслу податель на благое, а не на злое. Но молю убо вас, четыре евангелисты и апостоли Иоан Богослов, Матфей, Марко, Лука, и вселенстии учителие Василий Великий, Григорий Богослов, Иоанн Златоуст, Афонасей и Кирил Александрийский, Кирил епископ Катанский и Мефодий епископ Моравский, преподобнии отцы Иоан Домаскин и Феодор игумен Студийский, упросите у Господа Бога милости и даст ми благодать[1] во отверзение уст моих. И благословите мя, и наставите мене//(л. 18) грешнаго на путь, и отверзите ми ум, и даруйте ми смысл, еже писати житие преподобнаго Пахомия Чюдотворца, иже созда обитель во имя Пресвятыя и Живоначалныя Троицы на месте, нарицаемем Сыпанове, во области града Костромы. О нем же начало сице положим.

Сей преподобный отец наш Пахомий рожение и воспитание имеяше града Владимера зовома от отца именем Игнатия и матери Анны. Отец же его служитель бысть иерей//(л. 18 об.) у церкви святаго Николы, бе бо правдиви суть пред Богом, има же дарова Бог сие отроча веры их ради. Како родися има отроча се, и нареченно быссть имя ему Иаков, посем же второе святым крещением просветиша и крестиша его во имя Отца, и Сына, и Святаго Духа. И ростяше о Бозе отроча, и бысть седми лет. И вдан был учитися святым книгам, и вскоре отроку како извыкшу божественному славословию и писанию.

Бе бо отроча Иаков//(л. 19) прилежа к Божиим церквам, беспрестани хождаше на пение, сверьстни же своими никакоже игры творяше, но тихостию ходяше, аки дряхлуя. И бе отроча Иаков часто входя в монастырь Рожества Пречистые Богородицы, идеже бе почивает святый благоверный князь Александр во иноцех Алексей Невский и Владимерский. И возгореся духом святым сердце его, и вострепета душа его любовию божественою, бе бо огню божественому зажегшу душу его, возжеле бы//(л. 19 об.)ти инок. Бе бо огню божественому зажегшу, на то ведяше его Дух Святый, яко же апостолу глаголющу: «Братие, вемы, яко любяшим Бога вся поспешествуют во благо» (Рим 8: 28). И по сем отцу его преставшуся от жития сего, сему же Иакову вземше благословение у матери своей и сродник их, отиде в монастырь Рожества Пресвятей Богородицы и от ту сущаго архимарита повелением от некоего священноинока постригает власы главы своея и вкупе вся влекущая мудрова//(л. 20)ния отрезает со отятием влас. И нареченно бысть имя ему во иноцех Пахомии. Бе же святый возрастом тогда бысть 12 лет, егда прият ангельский образ.

И отдан бывает под начал некоему старцу совершенну по Бозе житием. Преподобный же Пахомий не имамы никако же своея воли, но по вся, елико повелит ему старец, той творяше. Елика мину четыредесят дней, и паки по сем повелением архимарита посылаем бывает Пахомий в хлебню, и в ней//(л. 20 об.) добре тружашеся. В нощи же без сна пребываше и сим дручаше плот свою, томяше. И в сием много лет потрудися, и по сем тоя обители архимарит, поим с собою Пахомия, и иде с ним ко архиепископу Владимерскому Алексею, да поставит сего Пахомия во дьяконы. Архиепископ же Алексей постави его, Пахомия, в чин дьяконства, Пахомий же бывает дьякон во обители Рожества Пресвятей Богородицы. И бысть во дьяконех много лет, дондеже святый архиепископ Владимерский Алексей возведен//(л. 21) бысть на великий престол руския митрополия Богом спасаемому граду Москве. Егда великий Алексей митрополия сподобися, и по времени некоем святитель Христов Алексей митрополит прииде во град Владимер, и быв во Владимере, строяше монастырь царя Константина и христолюбивыя матери его царицы Елены. Сего же Пахомия святый Алексей знааше и постави Пахомиа игуменом в монастырь святаго царя Константина.

Преподобный же Пахомий будет игумен и наставник братии.//(л. 21 об.) И пребысть Пахомий в монастыре царя Константина неколико время, строяше монастрь и спасаше братию, но Божия благодать прииде нань, еже восхоте преподобный Пахомий изыти из монастыря, и отити в пустыню, и составити монастырь. И сею мыслию всегда старец Пахомий побеждаем, яко же рече псаломщим: «Боже, в помощь мою вонми, Господи, помощи ми потщися» (Пс 69: 2). Сие же слово всегда преподобный Пахомий имеяше в сердцы сый и паки реченно бысть: «Возверзи на Господа печаль твою, и Той тя пре//(л. 22)питает» (Пс 54: 23). И обнощь некую востав святый, и отиде отай из монастыря и от града, не имый с собою ничесо же, развее правильну книжицу и псалтырь.

И отиде в пределы Костромския, и прииде на место, нарицаемое Нерехта, и обита ту у некоего христолюбива мужа неколико дней, Богу тако изволившу, а преподобному восхоте ту пребыти. И нача преподобный Пахомий окрест места, наречемаго Нерехты, ходити, ища себе покоя, где бы ему пустыньку малу изобрести. И прии//(л. 22 об.)де на некое местьцо малао, зовомое от древних человек Сыпаново, близ реки Солоницы и на речке Гридевке. Местьцо же оно вельми красно, кругом убо обыде речка Гридевка и впаде в реку Солоницу. Преподобный же Пахомий виде место то, и возлюби е, бе бо веря? бысть на месте том лес.

И паки иде преподобный в Нерехту и прошаше местца того у християн. Они же совет сотвориша между собою и с радостию даша преподобному местцо и земли, елико требует//(л. 23), и вси возрадовашася пришелствию святаго к ним. И тако мнози, шедше со святым на место то с секирами, и лес посекоша, и огню предаша, и место отребиша, и малу келейцу вскоре святому поставиша, и яшася вси святому помогати и монастырь строити. И по сем преподобный Пахомий с народом написаша образ Пресвятыя и Живоначалная Троица и ко написанию вземше святый образ со множеством народа, со образом поиде преподобный в пустыню на Сыпаново. И пришед, поставиша образ//(л. 23 об.) на месте, идеже быти церькви и монастырю, и пев святый молебная за великия державныя князи и за митрополита, и благослови народ. Они же разидошася кождо во своя си.

Преподобный же вниде в келейку свою, и молитву сотворь, и рек: «Се покой мой в век века, зде вселюся» (Пс 131: 14). И паки рек: «Яко Господеви годе, тако и будет» (Иов 1: 21). Людие же места Нерехты по вся время приходяще ко святому Пахомию, очищающе место, где быти монастырю, и бревна готовляху на церковь. Преподобный же//(л. 24) Пахомий паки с ними же тружашеся, людие же благодарнии приношаху ко святому Пахомию овии хлеб печены, а инии соль и ина потребная на строение монастырю. Преподобный же Пахомий попремногу благодаря Господа Бога и Пречистую Богородицу, яко дошед таковых благодарных человек, и их благословяше святый попремногу. Бе бо вси окрестнии человецы ради пришествию преподобнаго Пахомия и спомогающе во всем преподобному. Посем же Господу Богу изволившу и того повелением начаша ко//(л. 24 об.) святому братия приходити. Преподобный же приимаше всех, яко чадолюбивый отец, овии же мирстии людие приходиша ко святому, молящеся, еже облещися во иноческая. Преподобный же Пахомий постригаше их, и сии сожительствоваху со святым, и бе нужда им о поставлении церкви, и уже все изготовиша к строению церковному.

О поставлении церкви.

По сем преподобный игумен Пахомий, поим с собою единаго от братии, и немедлено иде в господствующий//(л. 25) град Москву ко архиерею Алексею митрополиту, и виде его митропролит, и благослови, бе бо знаем святителю. Старец же Пахомий рече: «Благослови, владыко, в пустыни храм воздвигнути в пределех града Костромы во имя Пресвятыя Троица». И беседова святитель о пользе духовней, и немедлено даст святитель благословеную грамоту и антимис на освящение церькви, ведый святитель духовную святость старчю. И повеле ему монастырь строить и вскоре отпусти старца. И тако игумен Пахомий прииде во свою пустыню на//(л. 25 об.) Сыпаново, несый с собою от митрополита Алексея благословение, и грамоту, и антимис. И тако начаша церковь здати з боголюбивыми мужи, сам же преподобный Пахомий паче всех преже на деле церковнем обреташеся. И помощию Божиею и благословением святаго святителя Христова Алексея митрополита Киевскаго и Московскаго Всеа Руси и молитвы ради игумена преподобнаго Пахомия вскоре храм сорудиша и украсиша ю иконами по чину церковному, тако же книгами, я< ко> //(л. 26) достоит церквам. И яко же время бысть освящению церкве, преподобный же игумен Пахомий со священноиереи и со множеством народа освяти храм во имя Пресвятые и Живоначалныя Троица по правилу и по уставу святых отец. И возсылаше в нем благодарныя молитвы Господеви о сем. И тако сие до зде, подобающее же да приложится зде.