О преставлении святаго.

По сем же преподобный Пахомий разуме свое преставление от внешних на небесная во он некончаемый век. И в телесный недуг впаде, и вельми изнемог, готовящеся душа к Богу. И призва святый//(л. 29 об.) братию, и глагола им: «Аз убо, чада, отхожу света сего и предаю вас Пресвятей Живоначалной Троице и Пречистей Богородице. Вы же изберите себе кого хощете имети з Богом вместо мене игумена». Братия же вси, яко единеми усты возопиша, глаголюще: «Хотели быхом, отче и пастырю наш, вси погребени быти тобою, но Господеви Богу годе, тако и будет» (Иов 1: 21). Преподобный же рече им: «Наставник вам да будет вместо мене брат наш Феодор». Бе бо Феодор едино пострижение//(л. 30) имый со святым Пахомием во едином монастыре, и сей Феодор прииде в пустыню ко преподобному Пахомию. И много святый поучив и наказуя ко спасеному пути, како имети чин монастырьский по правилу и по уставу святых отец. Прирек же святый и сие слово: «Братие, терпите находящая на ны скорби на сем месте, да обрящем благодать Божию». Сам же им последнее благословение и прощение, о Христе целование дав, и отпусти их кождо во своя си келия. И марта в 21 день в 3 час дни причасти//(л. 30 об.)ся святый телу и крови Господа Бога и Спаса Нашего Иисуса Христа, восприя безсмертнаго спутника. И мал час мешкая, и руце свои воздев горе, зря на образ Пресвятыя Троица и Пречистыя Богородица. И рече: «В руце твои предаю дух мой» (Лк 23: 46). И с миром успе в лето 6892 году во дни благочестиваго и великого князя Димитрия Ивановича Московскаго, иже нарицаемый Донский, и при освященном Пимине митрополите Киевском и Московским и всеа Русии. (Тому убо правящу тогда престол руския митрополи, Кипреяну//(л. 31) убо митрополиту отшедшу в Киев, а сему Пимину возведену на престол великие церкви, иже на Москве, но мы сие оставим). Братия же трудолюбное тело отца Пахомия вземше, и погребалныя ризни оболкше, и гробу предаша, и надгробными песньми почетше, и погребоша святаго в созданнем от него монастыре у Живоначалныя Троица на месте, наричемом Сыпанове одесную страну олтаря. Бысть же тогда снидеся мног народ на погребение святаго Пахомия.

Чюдо и явление преподобнаго Пахомия о старце Илинархе.// (л. 31 об.)

Брат же некий именем Илинарх прииде в монастырь к преподобному Пахомию и труждашеся со святым, еще же и художество имеяше той старец иконное писание. И бысть ему пакость от беса: томим бысть блудным помыслом. Много же сей старец трудов положи к церкве еще при святем Пахомии. По преставлении же преподобнаго Пахомия во второе лето нападе на того старца вельми блудный помысл, яко всей братии поведа суть. И уже старец не могий с помыслом братися, и во едину нощь ста//(л. 32) на молитве пред образом Господа Бога и Спаса Нашего Иисуса Христа и со слезами Бога моля, преподобнаго же Пахомия в помощь призывая, да поможет ему от страстнаго беса. И бе часто исходя ис келии к могиле старца Пахомиа и плачася у гроба святаго, и утомися вельми. И вшед в келию, усну мало, и се абие видит пришедша к себе старца святолепна и сединами украшена, браду имеюще долгу, белу, аки снег, в руце же его жезл. И глагола: «О брате Илинархе, тако всегда молися Господу Богу и Пречистой Богородице, и аз о тебе молих Господа и Пречи//(л. 32 об.)стую Богородицу, и Господь помилова тя, ктому не согрешай. Се исцелел еси от помысла своего». И удари его жезлом по лядвие левой. Старец же воскочи, и содрогнувся, и возрев, и видев преподобнаго отца Пахомия стояща, и паки святый глагола: «Не ужасайся, чадо, напиши образ подобия моего. Причтел мя Господь Бог в лик преподобных. И сие видение поведай». И ктому невидим бысть, скоро же Илинарх воста, и сие видение виде и поведа игумену и братии, и ударенное место показуя. И сие видевше и слышавше, прославиша Бога. И скоро старец Или//(л. 33)нарх написа образ преподобнаго Пахомия, и устроиша гробницу над мощми святаго, и поставиша святыя иконы, тако же и образ святаго Пахомия. И оттоле пребысть старец без пакости, Бога Нашего славя. Многа же и ина повести достойно на святаго преминухом, небесная убо высота, и земная широта, и моря глубина, и святых человек чюдеса не изочтена суть. Единому Богу вся сия сведома, аз же сие написах, вразумление даде, о сих же убо конец слова восприимем.

[1] Слово под титлом. Может быть, благо.