О строении монастыря.

Посем преподобный отец наш Пахомий игумен нача труды к трудом прилогати з братиями, иже ту с ним сожи//(л. 26 об.)тельствуют. К сему же и инии боголюбивии мужие тружающеся с ним, мнози бо людие приходиша ко святому, спомогающе ему тружатися. Святый же начат келии здати, и вне монастыря место разчищати, и нивы насевати, рожь и жито, рекше ячмень и овес. И сии от своих трудов питающеся. И тако Пахомий устрои монастырь общежительный и оплотом огради, содела же и гостинницу, в ней же преподобный Пахомий з братиею и с приходящими гостьми хлебствующе. Окре//(л. 27)стнии же жителие вси радующеся пришествию святаго и подаяху святому на строение монастырю кийждо от имения своего. Устави же святый келаря и казначея, четца же и певца и еклисиарха все по чину монастырьскому. И оттоле прослы он монастырь Пресвятыя и Живоначалныя Троица, иже на Костроме, на месте, нарицаемом на Сыпанове, еже есть и доднесь именуется Пахомиева пустыня Сыпанов монастырь в Нерехте, от Нерехты убо токмо едино поприще, рекше верста. И тако преподобный Пахо//(л. 27 об.)мий состави общежителный монастырь, и в нем не исходя многа лет потрудися и до исхода душа своя ко Господу. И по сем некий христолюбивый муж, имея велию веру Живоначалной Троицы, и любовь нелицемерну о Бозе духовную ко преподобному игумену Пахомию нерехчанин с посаду и дасть в монастырь два колокола. Третий же купиша на даяние боголюбивых мужей. И бысть все по чину монастырьскому, сие же да скратим, подобающее же да приложится зде.

Чюдо преподобнаго Пахомия о беснующемся.//(л. 28)

Человек некий в посаде в Нерехте от многаго пиянства смятеся умом и несмысленая глаголаше. Сердоболии же его много трудишася с ним, и не возмогоша ничто же сотворити. И егда бысть водам освящение августа в первый день, преподобному же Пахомию в монастыре своем изшедшу со святыми иконами и с честными кресты на освящение воде на речку Гридевку, и освятиша воду. Оного же беснаго ведуще в монастырь ко святому, и не успеша с ним на освящение воды. Преподобный же Пахомий виде ведомаго и повеле на брезе со кре//(л. 28 об.)сты постояти, да приведут беснаго, сам же начат молитися Богу, и скоро приведше его. Святый же повеле его возвести на Иордан и взем крест, иде оградити его крестом, и огради беснаго. Бесный же воскрича вельми и вержеся во Иордан во воду и глаголаше: «Оле, нужда сея, огнем мя опали старец». И паки ста в воде, бе бо неглубоко и нача со слезами молитися святым образом. И пойде сам за кресты в монастырь, никим же водим. Людие же вопросиша его: «Что воскрича и ввержеся в воду?» Он же//(л. 29) рече: «Егда мя Пахомий крестом огради, и тогда от креста изыде огнь велий и опали мя всего. Аз же убояся и ввергохся в воду». По отпении же литоргии преподобный Пахомий даст ему просвиру снести, и оттоле не бысть ему пакости ничто же. И сие видевше людие, прославиша Бога, в Троице славимаго.