Бубуйрин чуьл

Бубайрин чилел бубуйрин сува

Ярх хьана, вилер атIумна цава,

Заз яргъал йисар бушлухрай вили

Къалур хъувуна Аллагьдин гъили.

Ахкуна заз мад зи диде жегьил,

Лацу шал алаз, рехи тушиз кьил.

Хразва, ингье, ада цIийи гам, –

Гьатнай зи рикIе сифте яз илгьам…

Бадеди хьра цIай тунва къизмиш –

Ракъар хьтин фар ийизва туькмиш…

Гьахьтин са чIавуз зи къула хурун

Гуз алахънай зун шиирдиз чурун.

Зуларни хъуьтIер, гатфарар, гатар –

Вири сад тир заз – уьмуьрдин хтар.

Амма чир хьана са сеферда заз:

Уьмуьр ухшар я бубуйрин суваз.

Хайи кIвал туна фидайла яргъаз,

Дагълари багъри лагьанай: «Акъваз!»

Хьанач ван заз, чир хьанач а чIавуз

Сува бубуяр амайди ян гуз…

Гьа чIавалай заз, тачагъайдаз бахт,

Чир хъхьанач гьикI алатнатIа вахт.

Ажеб туширни бубуяр хару

ТухудачиртIа икьван фад гару!

2007

* * *

Чуплах багъдин тарарикай

АцIай вацран гъам аквазва.

Йифен алциф цаварикай

Зи квахьай илгьам аквазва.

«Хъша тIун зи патав!» – лугьуз,

Квахьнавайдаз минетдач за.

«Вахце руьгьдив ялав!» – лугьуз,

ТIалабдач за, гьуьжетдач за.

Лугьуда: «Зи рикIин чирагъ

Хана, чилик акат хьанва.

Варзни зулун кIватнавай багъ

Заз амай кьве савкьат хьанва».

2007

* * *

Физва, физва зун, рехъ атIуз,

Мензил атIуз,

Яд хъваз, факай са хъвехъ атIз,

Са цIил атIуз;

ВацIукайни ва цIукайни

Са тил атIуз;

Уьлендавай нацIукайни

Кфил атIуз;

Умуд тIатIуз, кьарай атIуз,

Цав-гьуьл атIуз;

Тежез гъетер цавай атIуз,

Гуьгьуьл атIуз…

КIанзава заз чIал атIуз – саф

Къизил атIуз,

Дуьньядикай, течир инсаф,

Кьве вил атIуз.

2007

* * *

Гана гьаким бубади

Вичин машин гададиз.

Джинсдин костюм алукIна,

Джирас джипда ацукьна.

Бубади: «– Хва, жемир жир,

Зун тахьай вун жеч тажир».

Хва кьве кIвачин виневай:

«– Види гаф туш биневай.

Ийидайдаз тажирвал

Герекди я са чирвал:

Вири маса гуз чир жен,

Акатнавай фус чир жен».

«– Хайи халкьни, Ватанни,

Аллагь, намус, вижданни

Маса гуз жер затIар туш!

Ваз идакай хабар туш?»

«– Гьабур маса гайибур

Я дуьньядин чIехибур.

Амай вири метягьар

Тажирдиз я теспягьар».

Хциз машин багъишай

Гаф ахкъатнач Багъишай,

Фикирна: «И куьлягьдиз

Зунни я са метягь хьиз».

2007