Ясин ва билбил

Кьейиди накь кучуднава,

Къе пакамахъ адетди

Халкь дуьадал акъуднава,

Гафар лугьуз рагьметдин.

Итимарни кьилер лацу,

Жаванарни рекIв алай

Хажалатдин зурба пацу

Кьунва, агъзур кек алай.

Гатфарин рагъ са уьтери

Хъиткьин жезни-тежезва.

Ванер-сесер авач гъейри,

Анжах Ясин «ишезва».

Авазлу я фекьидин ван,

Авахьзава чIун галаз,

Динж хьуй лугьуз кьейи инсан

Эхиратда хун галаз.

Садлагьана тарцяй къалин

Ван акъатна билбилдин.

Адан дуьа, адан везин

Дережа тир кфилдин.

Гьам уьмуьрдин, гьам гатфарин

Тариф ийиз гьевесдив,

Гьуьжетзавай генг цаварив

Гьавалу яз, сересдиз.

Садаз – жегьнем, садаз – женнет

Хиве кьазва Ясинди.

«Кьведахъни са ава къимет», –

Гаф я къушран везиндин.

«Сад Аллагьди чан хкида

КIарабрални чилевай».

«Абурукай накьв хъийида,

Тум чандал гъун хивевай».

«Кун тийидай къацу тарцин

ЦIукай квезни пай ава».

«Гьардахъ вичин цавун, чилин,

Гьамни руьдин пай ава».

ХарапI тежер араб гафар

Авахьзава сефилдиз.

Садни авач вичин япар

Ачухдайди билбилдиз.

Билбил мадни къизмиш жезва,

Гьатна михьиз гьуьрсуьна:

«Инсан, вун куьз уьтмиш жезва

Камилвилихъ терсина?!

Халикь вич сад тир саягъда

Са инсанни тикрар жеч,

А дуьньядин ам утагъда

Сагъ хъхьунин хабар жеч.

Вуч хьанатIа, вуч жезватIа,

И дуьньядин девлет я.

Халкь хьайиди пуч жезватIа,

Ам Аллагьдин адет я.

АватIа вич атIа дуьнья,

И дуьньядин хъен я ам;

Зурба тар и ятIа дуьнья,

Агъа дуьнья – цен я ам.

Ава анжах и дуьньяда

Гьам жегьнем, гьам женнетни.

И дуьньяда квез гьар садаз

Гуда къведай къиметни.

Гъалиб ийиз чилел женнет

Алакьдайди са куьн я.

Сада садан хуьнуьх гьуьрмет

Женнет хьунин замин я...»

Тамамарна диндин шартIар,

Халкь чкIана сефилдиз.

Садни хьанач вичин япар

Ачухайди билбилдиз.

2006