Сажидин Саидгьасановаз ачух чар

Сажидин дах, мубаракрай сувар ваз,

Ви хийирдиз иридни ноль яшар ваз.

Гила жуваз кефер чIугу Куьреда

Жегьил чIавуз чIугваз тахьай жуъреда.

Герек, пехил жен вал вири жаванар,

Акурла вал элкъведайвал жейранар:

Вуна чIалар атIай рушар нинияр,

Этерияр, Къветерияр, Къарнияр.

Кьун хьайитIа вирибурун тIварар за,

Мумкин я бес тахьун са тонн чарар заз.

Гьикьван ялда? Жувал сагъ чан, жнаб тур,

А дуьньядиз хутахдай хам-кIараб тур.

Салар-багълар на килфетрал илитIа,

Йикъа-йикъа жуваз са къуьр хиритIа.

ЧIехи хьанва ви хтулар – балаяр,

Вахце абрув на хиве кьур шапIаяр.

Дустаризни гуда лагьай къуьрер це,

Памадурни афни, ични чуьхвер це.

ПIапIрус чIугу, эрекьни хъухъ, шарабни,

Жез хьайитIа, хкваш жегьил са пабни,

Кайванидиз куьмек жеда, эрк жеда,

Ви чандайни кьуьзуьвилер терг жеда.

КIваликайни мугьмандин кIвач атIумир,

«Вун накь вучиз атаначир?» лугьумир.

Чка течиз ам эцигиз-къачудай,

РикIни тамир вуна адаз тагудай.

ЧIулав гьерен кьил галудна, шишер ягъ,

Хъвайибурал алава мад вишер ягъ.

Чими месик ая жуваз ахварар,

ХъуьтIуьзни кваз неъ хъикьифар, афарар.

Кьасумхуьруьн рехъ кIвачелай хъийимир,

Махачкъала галай патахъ хъфимир,

РикIяй акъуд Лезгистандин районар,

Бес я гатай югар, ялай ругунар.

Хайи хуьре фена Кпул булахдал,

Ярх хьухь жуваз къацу векьин сумахдал.

Хатадай ви кьилиз цIарар атайтIа,

Физвай садаз багъиш ая гьавайда.

Фекьивилер, мискьивилер бес я ви.

Муаллимвал ва гьакимвал квез я ви?

СтIал хуьре вун пуд лагьай эС-эС я,

Ийиз тахьуй лугьудайвал: «Мад бес я!»

Бес я катиз-галтугай кьван, залум кас,

Лезги чилин гьар са пипIе малум кас!

Арифдарри чIугвадайвал кеф чIугу,

Нерин хилез тенбек чIугу, эф чIугу.

Памадуррин сал я дуьнья – ваз чида:

Битмиш жеда, дигмиш жеда, ктIида.

Сад Аллагьдиз гуда чна жабар,

Гьисабда чи гунагьарни сувабар,

Азабарни гьисабда Зулжалалди,

Кеферинни сан кьада чи гьалалдин.

Виридалай кефер тIимил хьайитIа

Мад ада ваз ийидайди ийида.

Вун атайла, хабар кьада Худади:

«Вун накь вучиз атаначир, бубадин?»

Чилин винел вуна гайи суалдиз

Маса рангар гуда Цавун Шарвалди.

Кьарай атIай Сажидин дах, я хвайди,

Къе ви яш я кефер патал дигайди.

Дустар галаз чIугур кефер бул хьурай,

Гьайиф текъвез харждай кьван вахъ пул хьурай!

Амма авач ахьтин пулар, къизилар,

Акьул-камал ийиз жедай кьезилар.

Бедендин кеф – им терездин са хел я,

Камалдив кеф чIугваз гице эвел яз.

На кьве хелни авун патал барабар,

Ваз мад йисар гуй Аллагьди са гъамбар!

Балайрикай рикI секин, сагъ чан хьурай,

Хъсанвилер рикIиз кIандай кьван хьурай.

Пуд СтIалар цам ятIа, вун са къаш я.

Тестикьайди и чIал Арбен Къардаш я.

Р.S.

КIандайбуру разивилин къул эциг,

Юбилярдихъ галаз хъвадай пул эциг!

А.Къ.

2003

АРАРАТ

Ялгъузвалин ядаланда

Юргъун хъанва гими зи.

Куьз лагьайтIа пар заланда,

Амма кьуд пад – гьуьм ицIи.

Керематар, аламатар

Ийизва за бажармиш.

Цаву гайи аманатар

Ийизва за къутармиш.

Къвердавай пар залан жезва,

Руьгь я мадни гьарарат.

Анжах са заз зи ван жезва:

«Гьинва вун, зи Арарат?!»

Ким-киме яз какахьзава

Зи йикъарни йифер зи.

Лув гуз, хквез акьахзава

Зи къуьнерал лифер зи.

20.07.2003