Студопедия

Главная страница Случайная страница

КАТЕГОРИИ:

АвтомобилиАстрономияБиологияГеографияДом и садДругие языкиДругоеИнформатикаИсторияКультураЛитератураЛогикаМатематикаМедицинаМеталлургияМеханикаОбразованиеОхрана трудаПедагогикаПолитикаПравоПсихологияРелигияРиторикаСоциологияСпортСтроительствоТехнологияТуризмФизикаФилософияФинансыХимияЧерчениеЭкологияЭкономикаЭлектроника






На низ лугьуда.






На низ лугьуда, ацIанвайла рикI,

Шаклувилери авурла гъарикI?!

Ви хурун къувдиз дар тирла кIалхан,

На низ гьарайда, такъатдайла ван?

Ялгъузвилин йиф – ламу лит чIулав,

КIеви хьанвай чил, кьакьан хьанвай цав

Элкъвенвайла вал, рамиз ви бейни,

На низ лугьуда? Яб гуда ваз ни?

Вун тар я хьайи гатфариз штIум,

Вун – Яран йифиз хкахьай палдум.

Ви дувулрик кьеж, ви руьхъведик цIай

Кумазма! На низ ийида гьарай?!

Я няметра вил, я девлетра вил

Тунач на, руьгьдин фу ийиз гьасил,

Ви руьгьдин ризкьи абурдай вегьиз

Алахънавайла, на лугьуда низ?

Низ жеда ви ван, низ жеда аян? –

РикIер къванер я тежедай миян.

На низ лугьуда? – Жуваз лугьуда,

«Ни гъанва зун и йикъаз?» – лугьуда.

На низ луглуда? – Цавуз лугьуда,

Цаву ваз атIуз-атIуз лугьуда:

«Кьуранни ийиз, хкида на цуьрц,

Хкахьай ви цIук мад ахкатда гьуьрс.

Къванцизни ви тум вегьидай са фер

Гьатда ваз – ада ахъайда цIирер.

ЧIулав лит жувахъ галчукна алад,

Ви руьгьдин ризкьи жерди туш баят».

1996


ЯШ

Заз Месигьдин яшар хьана алатна,

Амма гьеле алама зун хашунал.

Пушкинан яш багъишна заз кьисметди,

А йисарин парцик, иви авахьиз,

За баябан чуьлда гъамлуз цIугъзава:

«Я чан Аллагь! Я регьимлу Зулжалал!

Куьз вун завай чара хьана, зун туна?!

Ваъ, зи азаб михервай туш зун кьунвай,

Хиревай туш кузвай пакун тIвалара,

Туш Дантесан гуьлледивай къене ви, –

КичIевиляй, шаклувиляй шезва зун:

Белки, бицIи алатунни легьзе са

Реббиди зав чарчин луьле вугуда

АцIурнавай кьисмет гьялдай кхьинрив

Ва лугьуда: «Фад кIела кван ван алаз!

Яраб, Аллагь, завай кIелиз жедатIа?

2001


САИЛАР

1.

Шегьер тирвал сиягь хьанва саилар,

Гуя цавар илифнава чилерал.

Бахтсузвилин, ажузвилин векилар,

Вуч каламар кхьенва куь вилера?

 

ТIалабзава гьар са пипIел, куьчедал,

ТIалабзава, гатаз сa-сад paкIapap...

Амани куьн тахьай чка уьлкведа?

Куь вил алай затI амачни цавара?

2.

«Це лугьудай кас атайла варарал,

Яъ лугьумир, бала чан.

Фу-къафун це, яд це тирдаз гьарарат,

Ваъ лугьумир, бала чан.

 

Пайгъамбарар, михьи ксар къведалда

Къекъверагдин хун алаз,

Багъри ксар – кьейи ксар къведалда

Саилвилин дун алаз...» –

 

Ахварай ваъ, фад алатай йисарай

Зи бадедин гафарин

Ван гьатзава зи рикIе, зи мастара –

Садакьа яз цаварин.

3.

Аквар гьалда, чилерал

Артух хьанва йикъар заз,

ГьикI хьи – къе зи къуьнерал

Теквал хьанва сa пар заз.

 

Хъфенва зи багьабур

И дуьньядин рекьерай –

Акурбур зи такабур

Руьгьда авай гевгьерар.

 

Ялгъузвилин хура заз

Гзаф жезва сефилвал –

Це лугьурбур пара яз,

Тагурбурун саилвал.

4.

Пайгъамбарар? Акьрабаяр? Муъминар?

Куьн гьим ятIа? Вуж ятIа?..

Чилин гишин руьгьдиз цавун рикIинар

Ачухзавай луж ятIа?..

 

Зун лайихлу жедатIа пак Регьимдиз

Даимлухдин жигъирра,

Хкведайвал чилел етим-саил хьиз,

Кьил чIугваз зи ерийрал?..

200I



Поделиться с друзьями:

mylektsii.su - Мои Лекции - 2015-2024 год. (0.007 сек.)Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав Пожаловаться на материал