Кьведан ялгъузвал

– Уьмуьр физва... Чна адан къуьруькар

Кьабулзава, кьисмет-кьадар я лугьуз,

Чи мурадрин сув тирвалди къиригар

ЭкъечIнава, гьахьтин вахтар я лугьуз.

Зи азизди, чиг язма чи кIанивал,

Ам чи накьан бахтни къенин инад я.

Чаз гьар садаз хгузмайди чимивал

Жуван ажал сифте хьунин мурад я.

20.11.2004

* * *

Писни хъсан, атай кьилел,

Вири алуд рикIелай.

Тур уьмуьрдин анжах эвел,

ЭхгечI цIийи цикIелай.

КIула цIийи гъалатIрин пар

Ая вуна тежервал.

ХьайитIани йикъар ви дар,

Гьалтда экуь йифер вал.

Вич вилериз таквадай сад

Ава – гьадаз лагь вуна:

«Зи гъавурда акьадай сад

Вун я – зи пад яхъ вуна».

Вичин ван ваз текъвезвайдаз

Ви дуьайрин ван жеда.

Адан патав рекьевайдаз

Гьам дувул, гьам тан жеда.

КIан жедач мад фейи йикъар

Ваз гадариз уьмуьрдай,

Тажедайвал квадриз гафар

Чап авунвай шиирдай.

22.04.2005

* * *

Икьван гагьда яшайишдиз

Килигна са саягъда:

Архайиндиз, асайишдиз,

Тамашдай хьиз гурмагъдай.

Вуч акуна? Вуч сух хьана

Ви бейнидин чумурдиз?

Са шумудра артух хьана

Акурдалай такурди.

Куь уьмуьрда ви рикl хана,

КIудна вун гьи уьзенгди?

Са шумудра эксик хьана

Какурдалай дуьзенди.

Са шумудра гзаф хьана

Шириндалай туькьуьлди.

Гьавиляй зун сарраф хьана

Тежрибадин къизилдин.

Заз акурдан далдадикай

Аквазва къе такурди.

За дердийрин харадикай

Хкягъзава агъурди.

Захъ дустарин хаинвилер

Эх ийидай гуж ава.

За кIватIнавай эркинвиле

Фер ийидай вуж ава?

Са кардикай гьайиф хьуни

Незва зи рикI, ци къван хьиз:

Анжах дабан зайиф хьуни,

Шарвилидин дабан хьиз.

13.06.2005

МИЛЕЙ

Цаварилай ятIа эгер,

Вун цавари гьикI ахъайна?

Ви къадимлу тIварцIи иер

Зи агалай рикI акъайна.

Чилин вири редна рангар

Авазди ви тIварцIе авай.

Ганг дуьзенар ва тик рагар

Заз вири са цIарцIе ава.

Зи рикIелай фенва вири:

Гьам жуван тIвар, гьам ви къамат.

Ви тIвар верцIи, ви тIвар ширин

Тикрарзава за мад ва мад.

Зи дуьани, асивал зи,

Женгинин къив ва гунуг рей,

Зи сефилвал, хвешивал зи

Сад я: Милей... Милей... Милей...

2005

* * *

Лагьай чIавуз за ваз «чан»

Вуна зи чан къачуна.

Хълагьайла за «аман»,

На зи аман къачуна.

Лагьайла за ваз «ширин»,

На зи уьмуьр туькьуьлна.

«Рагъ» лагьайла, цав секин

Булутривди кьвечIилна.

«Варз» лагьайла, йифекай

Заз вуна сур авуна.

«Гъед» лагьайла, хъилекай

Хци гапур авуна.

«Къвед» лагьайла, вун амал,

Жамал авай сикI хьана.

СикI галтугай къветрен гьал

Атайди зи рикI хьана.

«Ваз чIуру чIиж гьикI талгьун?!»

ЦIугъна за. – Вун цуьк хьана.

Гьарайна за: «КIанда вун!» –

Вуна заз ви рикI гана.

2005

* * *

Ава, лугьуда, виридахъ сергьят.

Лугьуникай чаз жедани регьят?

Чна сергьятсуз Аллагьни цавар

Тунва зигьиндин кIалубда кьегьят.

Гьахьняй кьадарсуз я чи тIал, ялвар,

Гьахьняй катзава чакай Авай Сад.

АтIанвайвиляй цаварикай руьгь,

Уьмуьрдин къула чун я пичIи руьхъ.

2005

* * *

РикIиз, йифен хана ахвар,

Хиял къведа, шагьвар хьиз:

«Вуч кеф тушни кхьин чIалар,

Эхиримжи цIарар хьиз!»

Инанмишвал жеда гзаф:

ЧIав жеда тIал авачир,

Аллагьдиз са хълагьда гаф:

«Зун садрани хьаначир».

2006

* * *

ДакIардихъ жив кIвахьиз жеда,

Ван авачир лайлай хьиз.

Йиф хиялра гьахьиз жеда,

Ксуда зун тахьай хьиз.

Ахвара заз живедин ван

Жеда: «Гила вахт я ви:

Ви вилик ква цавар кьакьан,

Гьаниз хъфин бахт я ви».

За живедиз вуч лугьуда,

Ширин хьанвай, диде хьиз?

ГьикI «Зун ви хва туш» лугьуда

Диде хъфей уьлкведиз?

Зун кьулухъди хкведач мад

Ахварин кирс жигъирдай.

Фида, лувар хьана акат,

Зун лайлайдин лепирдай.

Пакамахъ паб къведа кьилив, –

Адаз накьан йифелай

Зи дакIардихъ къвайи кьван жив

Жагъида зи кьилелай.

2006

КIВАЛ

Рекьизва вун, хайи кIвал,

Зун яшамиш жезма гьеле,

Заз идакай регьят жери кар авач.

Зунни, вун хьиз, ичIи хьанва гъурбатда.

Ви цларай фенва ферер – биришар

Давам жезва зи рикIе, зи кьисметда.

На заз талгьуз, ви бушлухда кIватI хьанвай,

Чеб гафариз элкъуьн тийиз, лал кьенвай

Къинелмишрин ван къвезва заз

И яргъариз, зи тапан кIвал-югъ хьанвай.

Ви алгъай багъ шехьзава захъ,

Вич вичелай алатнавай

Кьияр къведай дишегьли хьиз,

Зи уьмуьрдин чинар са-сад –

Фейибурни, къверибурни –

КIелзавай.

Зи рикIелай фидач, зи кIвал, садрани:

ЧIехи буба кьейила,

Телеф хьанай адан вири куьнуьяр,

Ичин тарар вагьши хьанай;

Жегьилзамаз кьейи чIавуз диде зи

Чи гьаятдал киф чукIурна алгъанвай,

За вичиз зи сифте чIалар лагьанвай

ЦIвелин тарни кьуранай;

Баде кьейила,

Багъдин юкьвал пагьливан хьиз къвазнавай

Чуьхвердин тар кьурана,

Къубудавай яд ктIана, лил хьана,

Багъда майдан ачух хьана цикеризни вергериз.

Ви айвандик ичIи хьанва

Чубарукрин мукарни –

Гзаф вахт я и вафалу къушар

Гъавурда гьатна:

И кIвализ хквер кас амачирди,

Я дергес гатар, маргъв тухун патал,

Я леэн ягъдай куьгьлен балкIандиз,

Я кьве яцрал вик эцигна залан,

Агулдна куьтен, цаз жедайди цан,

Я чидайди тарцел кIалам илигиз,

Я къванерикай, патар ягъна, цал

Храз жериди,

Я алакьдайди чIижерихъ гелкъвез,

Я гьич тахьайтIа ягъдайди кфил.

Са гафуналди, чан хайи кIвал, ваз

Гъилер бес жезвач,

КIвачер бес жезвач,

Кьилер бес жезвач,

Вилер бес жезвач,

Сивер бес жезвач,

Мецер бес жезвач,

Руьгьер бес жезвач,

РикIер бес жезвач,

Ванер бес жезвач,

Гьиссер бес жезвач...

Ви ялгъузвал, ви гъамлувал

ЧукIур жедай кас авач.

Вахъ амайди, кIвал,

Са чилни цав я.

Гьиссзамач на тIал,

Цларни къав яз.

АкьалтI хьана бахт,

Акъваз хьана вахт,

Даим са чIав я.

Вун яшамиш хьана, зи кIвал,

Чидач заз, зун яшамиш хьайиди ятIа.

Белки, зун вун туна фейи юкъуз гьа

Кьейиди ятIа?..

Гьавиляй я ви алгъай багъ датIана

Шехьзавайди, гьа кьейидал алгъана:

«СакIани ваз чир хьанач хьи, ясар гьей,

Дергес гатаз, векь ягъиз,

Леэн ягъиз балкIандиз,

Куьтен кьуна, къарабасдин хвал тухуз,

Къванерикай цал эцигиз,

КIалам ягъиз тарариз,

ЧIижерихъ гелкъвез,

Гьич тахьайтIа кфил кьванни

Ягъдай хьанач алакьун...

Ваз хьанвайди гуж я, гуж!»

12.05.2006