Цiийи йисан сагълугъ

Тостар – гафар сад жеда,

Гьардахъ вичин дад жеда:

Кьилел чими рагъ хьурай,

Виридан чан сагъ хьурай!

Хьуй кIвалера мехъерар,

Балайрикай – шегьерар!

Цуз! Тахъварди вуж хьурай?!

Хъухъ, азизбур, нуш хьурай!

Рагъ алахьиз мецелай,

Рахух цIийи цикIелай,

Гьар са рикIе чим хьурай,

Чи дар югъ гьа им хьурай!

Дуствал, садвал мягькем хьуй,

Къуни-къунши вирт-чIем хьуй!

Хъвана фена хъвайиди –

Таз жедани цайиди?!

Куьгьне йисан гьебеяр

ЦIийи йисан бине я.

Гьебеяр мад дулу хьуй,

Мелни межлис гурлу хьуй!

Уьлкведик пун акатрай,

Халкь кIеверай акъатрай!

Гьатун патал гуьнгуьна

Хъухъ – акъвазмир гуьгъуьна!

ЦIийи йис – им умуд я,

Квадардайди кубут я.

Инсанвилер артух хьуй,

Хъсанвилер буллух хьуй!

Ягьни намус кьит тахьуй,

Алагъ-салагъ шит тахьуй!

Гелягъ – ванрай бакъалри,

Рахаз цавун магьалрив!

Тост дуьа я чIаганвай,

Бокал кьуна лагьанвай, –

Къени хьурай гьар са кIвал,

Мани хьурай гьар са чIал!

Чи мурадрал чан атуй,

Аллагьдиз чи ван атуй!

Хъвайибуру мад хъурай,

Тахъвайбуру яд хъурай!

31.12.2004

* * *

Алукьнава мадни рагъдан

Шумуд агъзур сеферда.

Акуна заз, чизва адан

Суйни сифет. Иерда.

Иервал фад жезва кьери,

Гзаф жезва заланвал.

Зегъметрай заз гузвай кири

Сад я ада – пашманвал.

И къешенгвал, и гуьзелвал

Захъ авай са девлет я.

Руьгьдиз гузвай и эфзелвал

КьатIун тавун къелет я.

АкъатайтIа эхиратдин

Вар аквадай цIарцIел зун,

Зи рагъданрин гьакъикъатди

Яз тач вичихъ цIигел зун.

20.04.2005

* * *

Кьама ялар тваз, жув арифдар хьиз

Къалуруналди жедач вун виниз.

На сивел хъвер гъваш – за лугьуда ваз

Акьуллу яни, яни вун саймаз.

2005

* * *

Зун Джамидин муьруьдвиле хьана лагьайтIа,

ЧIалахъ жеда зигафарихъ са Омар Хайям.

За Хайямахъ галаз чехир хъвана лагьайтIа,

Анжах Джами чIалахъ жеда, туш лугъуз гьарам.

2005