Гъвечiи гадади кiелзава ктаб

Адетдин гадади хуьруьн

КIелзава ван алаз ктаб.

Гуя ам лепейра вирин

Эхъвезва, акьалтна азаб.

КIелчи я гьелелиг бицIи:

Четин я агулдиз гьарфар.

Амма рикI адан я хци,

Гуьзелиз куькIвенвай гатфар.

Илигна кIелзавай гада

Къавалла кIвалерин секуьл.

Лал кьенва вири кьуд пата,

Саймишиз пакадин векил.

Киснава къадимлу дагълар,

Биришра чранваз камал.

Киснава регьимлу цавар,

Акурла чилерин жамал.

Инсанар, сивик кваз хъуьруьн,

Физва, къвез, алатиз са-сад:

КьатIузвач ванце и ширин

Авайди Алемрин Устад.

Гадади ван тунва хуьре,

Чирвилив ийиз вич ацIур.

Жезва ам къемаз и жуьре

Уьмуьрдин тарсариз гьазур.

2008

НИЗАМИ

Низамидин шииратдин мескенда

Са шумуд варз акъудна за девриш яз.

Гьар са цIарцIяй – гьар са кузвай жуьгьендай

Чи Алпандин акуна генг ериш заз.

Алцурнач зун таржумайрин сувагъри,

Фарс чIални ваъ, дидедин чIал гьиссна за.

Лезги руьгьдин тIаратIрини чирагъри

Алдахна зун – веревирдна кисна за.

Ада лезги ибараяр мягькем тир

Туна, къазаб хьиз, фарс чIалан шевитда.

Адав гвайди лезги чилин къелем тир,

Лезги ранг тир авайдини девитда.

Чи чил, тарих тарашнава тежер кьван,

Шарвилини, тур гумачиз, кегькир я.

Къахчудайди авани са гевгьер кьван?

Низами чи вил галамай ивир я.

2009

ФИКИР

Уьмуьр вуч я? Кьур жаваб гун четин я.

Фейи вахтни, къвери вахтни дерин я.

Алатай вахт гьуьл я лепе кумачир,

Къвери вахтни гьуьл я лепе гъанвачир.

Уьмуьр – анжах гьа Инал я, Исят я,

Фейи-къвери вахт ви руьгьдин кьве пад я.

Гьа кьве патай аквазвачтIа Аллагь ваз,

Чилелла вун чан алачир сиягь яз.

2009

* * *

Халис шиирар кьит хьанва пара,

Амай шиирар шит хьанва пара.

Язух лезги чIал, ваз кьазвай зулум

Тек са Худадиз я жеди малум.

Яраб икI вучиз ялавлу илгьам

Шаирриз икьван хьанватIа гьарам?

ЧIиж цуькведикай магьрум хьанвани?

Цуьк мижедикай магьрум хьанвани?

Тар дувулривай къакъатнавани?

Халкь зулумрикай хкатнавани?

Вучиз къелемар хьанва икI къуьруь?

…Илгьамдин пери хьанвалда шеври.

2009

* * *

Тупар ягъмир, лезги стха, –

На халкь патал вуч авуна?

Лезги руьгьни лезги чухва

Вуна михьиз пуч авуна.

Лагь, валай вуч хуьз алакьна:

Дидедин чIал, садвал чилин?

Са кар валай дуьз алакьна –

Эх авун кьве-падвал чилин.

Пулни хьана сандухда ви,

Акьулни ви кьери хьанач.

Амма къваздай къуллугъда ви

Бахт лугьудай пери хьанач.

Вучиз ятIа чидани ваз?

Вавай лезги тIул хуьз хьанач.

Гел жагъуриз, вак вич акваз,

Руьгьдал ягьдин чIул хуьз хьанач.

Са лезгидиз тIар хьайила,

Вуна адан тIал гьиссзамач.

Халкьдиз дуьнья дар хьайила,

Ви ивиди звал гьиссзамач.

Бейкеф жемир, лезги стха,

Вун, пая хьиз, къуьруь хьанва.

Ваз килигна, керки-стха,

Халкьдин мезни куьруь хьанва.

2009