Студопедия

Главная страница Случайная страница

КАТЕГОРИИ:

АвтомобилиАстрономияБиологияГеографияДом и садДругие языкиДругоеИнформатикаИсторияКультураЛитератураЛогикаМатематикаМедицинаМеталлургияМеханикаОбразованиеОхрана трудаПедагогикаПолитикаПравоПсихологияРелигияРиторикаСоциологияСпортСтроительствоТехнологияТуризмФизикаФилософияФинансыХимияЧерчениеЭкологияЭкономикаЭлектроника






Миграгъ






Куьруьз-яцIуз вакай рахун мумкин туш,

Куьз лагьайтIа кьакьан я вун, вине я.

Им суза туш, им дуьа туш, тIелкьин туш,

Чарчел гъанвай зи сидкьидин чешне я.

 

Багъри Миграгъ!

Везинлувал уьлчмеда туна,

Илигдач за и цIарара кетиграл[2].

Чеб-чпелай къвез хьайитIа, атурай,

Жез хьайитIа, рикIин сидкьи лугьурай.

 

Вахъ галаз вакай рахун паталди

ЦIалцIам гафар, чIагай гафар герек туш.

Якъин абур хьун лазим я заланбур,

Шалбуздагъдикай

Хкатнавай къаябар хьиз,

Къеняй яру чIунар фенвай

Дамарриз ухшар,

И къванерал чан алайди къалуриз.

 

Вахъ галаз вакай рахун паталди

Гафар кIанда къекъвейбур,

Ви жигъирар хьиз, –

Агъадай винелди фенвайбур,

Амма вири санал акахь хъийизвайбур

Шалбуздагъдин кукIушра,

ГьикI ви булахар

Санал акахь хъийизватIа

ЧIехи вацIун гургурда.

 

ХупI туширни

Ви чешмейрин михьивални алцифвал

Тваз хьанайтIа гафара,

Кьезиларун паталди жуван руьгьдин къанихвал.

Амма гьинай атурай а магьирвал,

Няс девирди негьнавайла шаирвал?!

 

Хтанва зун къе ви патав,

Лавгъадаказ «Зун шаир я» лагьана ваъ,

Хтанва зун, катна жуван

Катуникайни-галтугуникай,

Челек-фелекдикай

Жуваз ватан яз кьунвай

Тахай шегьердин,

Зи луварин цIакулар,

Зи йисарин какулар

Чухвай шегьердин.

 

Хтанвач зун жуван дердер ахъайиз ваз,

Хтанвач зун шикаятиз кьисметдилай.

Хтанва зун вилер тухиз акунрив ви,

Япар тухиз хтанва зун

ЧIехи вацIун ванцив умун, –

Ам ван туш гьакIан,

Ван я вахтунин,

Девиррин ван я,

Ам кIелиз хьун,

Акьун адан гъавурда

Мурад я.

Руьгь тухариз хтанва зун

Шалбуздагъдин сабурдив,

Ви чуьллерин абурдив,

Хтанва зун

Гьалалвал къахчуз

Жуван багъри сураривай,

Зун буржлу тир руьгьеривай,

Зи рикI амай суваривай,

Бан-бубайрин кIвалеривай,

Куьз лагьайтIа,

Алакь ийиз,

Тавур крар ама пара;

Авур крар яз са хара,

Жезва – гьайиф! – вара-зара,

Яшайишди-безирганди

Ийизва зи йикъар гъара,

Акъваз жезмач адан хура…

 

Зи муг!

Зи мулк!

И угъраш заман

Агудмир жуван

Къурухрив!

 

Инсандин сифет амачир асир

Ахъаймир жуван кьакьан мескендиз,

Цуькверин атир, булахрин ширшир

Элкъвен тийирвал харжаф уьлендиз!

 

И мензилвал, и майданвал

Чилеринни цаварин,

И гуьзелвал, и вижданвал

Ви безекрин, таварин

Халкь авунва Сад Аллагьди

Авиляй хьи,

Вич иниз эвичIна амукьун патал

Тайин са муьгьлетда

Текдаказ, хелветда,

Яб гун патал вичи вичин гуьгьуьлдиз,

Вичин руьгьдиз, зигьиндиз;

Ацукьда Ам

Я Чандар булахдив,

Я Марвар булахдив,

Я вирив Суьрмедин,

Я Сувал, я Йигдал

Ада кIвач эцигда,

Килигда, килигда

Лезгийрин хуьрериз,

И чилин хирериз,

Кьил вичин галтадда,

Чилел кап алтадда…

 

Тада и шиир за

Ам фидай жигъирдал,

Зи Миграгъ,

Зи Миграгъ.

2010


 

 

ПОЭМАЯР



Поделиться с друзьями:

mylektsii.su - Мои Лекции - 2015-2024 год. (0.009 сек.)Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав Пожаловаться на материал