Студопедия

Главная страница Случайная страница

КАТЕГОРИИ:

АвтомобилиАстрономияБиологияГеографияДом и садДругие языкиДругоеИнформатикаИсторияКультураЛитератураЛогикаМатематикаМедицинаМеталлургияМеханикаОбразованиеОхрана трудаПедагогикаПолитикаПравоПсихологияРелигияРиторикаСоциологияСпортСтроительствоТехнологияТуризмФизикаФилософияФинансыХимияЧерчениеЭкологияЭкономикаЭлектроника






Физва буба






Физва буба жигъирдайтIуз чубандин,

Экуь гьава муьтIуьгъариз кфилдиз.

Хкаж жезва ам дагъдавай тIурфандиз,

Физва буба, кьуьзуь жезвай сефилдиз.

Хкаж жезва ам гуьлуьшан яйлахриз,

Лугьуз жеда гагь манияр адетдин.

Хъукъванвай фу хъуьтуьлариз булахрик,

Фикирарда рекьерикай кьисметдин.

ВацIар, тамар, чуьллер, дагълар, дуьзенар,

Куьгьне къазма, игис хьанвай чинардив,

Чиг балайрин сесер, багъри серденар,

Лацан суьруь, эглеш хьанвай дагьардив,

Таза кIелер, хаму тамун вишришар… –

Вири рикIе хуьзва ада – архади.

И дагъларин дар жигъиррин биришар

АтIудай кьван рехи я кьил бубадин.

Килигдайла зун жув авай яргъарай,

Хайи хуьруьз гагь зун гъамлу илгьамди

Хутахайла, акI жеда заз: мукьвара

Дах жигъирра юргъун жеда тамамдиз.

Амма рикIяй зун пехил я бубадал,

Пехил я зун адан гуьтIуь жигъиррал,

Адан гьар са пакамадин гьамгадал,

Адан чIехи камалдин къаш-ивиррал…

Физва буба, уьмуьр авай экуьна,

Шиш кукIушрихъ элкъуьрна кьил суьруьдин.

Лацу живер къвезва адан гуьгъуьна,

Адан вилик – къвазва марфар вили тир.

ГУЬЛЛЕДИКАЙ ШИИР

Кьена шаир ЧIулав вацIал,

Гъиле амаз тапанчи.

Рехи саврух пехъи чIалал

Рахана, хаз яван чил.

Маса сефер маса хуруз

Гьахьна чIулав кьуркьушум.

Килигзава адан суруз

Кьуьзуь Машук хурушум.

Дагъдин хуьре мадни са ван

Акъатзава тфенгдин.

Дуьньядикай жезва лакьан

Туьнт шаирдиз – пеленгдиз.

Алатнава шумуд йисар.

Кьуранва вацI дердинай.

Амма буьркьуь гуьлледи кар

Давамзава вирина.

Ада, цIийи лишанар кьаз,

Мад лув гузва девирриз.

Лап хъсандиз чизва адаз

Къимет халис шаиррин.

Йифен юкь я– ахвар текъвез,

Пак яз ягьдин терезар,

Кхьизва за: лянет хьуй квез,

Мартыновар, дантесар.

Къаравул я, рикIеваз хер,

Зун мидаим чIаларин.

Кьуркьушумдиз лайихлу жер

Майил гва зи цIарарив.

АХВАР

Аламатдин ахварай заз

Са дишегьли акуна.

Зи секинвал акваз-акваз

Ада пузмиш авуна.

За ахъайна адаз ракIар

КIвализ атун паталди,

Муьгьуьббатдин михьи чарчар

Хъун патал тух жедалди.

Кун паталди мидаим цIа

Адан руьгьдин, бедендин

И уьмуьрдин гурлу яцIа

Элкъведалди жуьгьендиз…

Амма зун тух хьанач… Багъдиз

Фена зун зи яр галаз.

 

Аватзавай пеш юмшагъдиз

Регъуьвилин яр галаз.

Гъамлу зулни зайиф яз чан

Аруш хьанвай чинарра,

Адан зенгер тир лап пашман –

Гуя шезва гитара.

Амма зи рикI архайин тир,

Дишегьлидиз туьмериз.

Какахьзавай адан атир

Хурушумдин гъуьмерик.

Зи шадвилин кьилелай тIуз,

Кьунваз чпин дердейри,

 

МичIи жезвай цавар атIуз,

Физва лужар къарнийрин.

Аватна чал зариф чайгъун

Лацу-лацу цIакулрин,

КIевна ада вичивди чун

Ва вири багъ юхсул тир.

Квахьна михьиз гелерни чи,

И чайгъунда гьатайла…

Амма дуьнья хьанай мичIи

Заз, ахваркай кватайла.

Цаварилай, цIакулар хьиз

Яргъаз хъфей дурнайрин,

Явашдиз жив къвазвай михьи,

Играмидан гьарай хьиз…

Гьар сеферда, къвадайла жив,

Зи рикIин тIал гурлу я:

Садан тIварцIи куда зи сив,

Нин тIвар ятIа – сирлу я…


* * *

Чухсагъул ваз хьайи кардай,

Хъижезмайдай чухсагъул.

Гьисс авач захъ вун инкардай –

Ваз кIан хьанай зун, зи тIул.

Аквазвач заз са тахсир вай –

Хъийизмач на зун кьабул.

АкъудайтIа на зун рикIяй,

Чухсагъул ваз, чухсагъул!

 

* * *

МичIи йифиз зун патал

На куькIуьрна цIай.

А цIухъай захъ – бахт я жал? –

Галукьзава къай.

Хушвал, ашкъи вилера

АватIани ви,

Ваз рикIе зи, гьиссера

Чка я кIеви.

МичIи йифиз за жуван

КуькIуьрзава цIай,

Адан цукIвар, галаз ван,

ЦIуьхт жезва цавай.

За гуьзелмиш ийизва

Заз кIаниди – сад.

Амма адаз мекьизва

Зи цIув, туш я шад.

 

Авар чIалай.



Поделиться с друзьями:

mylektsii.su - Мои Лекции - 2015-2024 год. (0.011 сек.)Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав Пожаловаться на материал