Разорение 23-му вопросу и ответу. 4 страница

Глаголаше же им Иисус: Яко несть пророк (л. 345)[1218] без чести, токмо во отечествии своем и в сродстве и в дому своем, то есть от отечствия своего, яко знает кто отечствие пророческое и соблажняет и не верует быти яко пророк. Якоже глаголется: Ни братия его вероваху в него. И паки: Сотвори что и зде, во отечествии своем, то есть в сродстве своем и в дому своем. И несть чюдно и государю царю, что ныне говорит, яко аз избрал, на хулу Святому Духу, аще исперва благ явился и достоин помазанием и возложением руки архиереиския на шествия Святаго Духа, якоже и Саул по помазании на царство Израилю от Самуила дар Святаго Духа име и пророчествова. И[1219] бысть, рече, егда возвратися (л. 345 об.)[1220] Саул от совокупления, разытися с Самоилом, и преложи ему Бог сердце на ино, и приидоша вся знамения в день он. И взыдет оттуду на холм и се лик пророческии противу ему, и взыде на нь Дух Божии, и прорицаше среде их. И реша вси людие, кождо ко искренему своему: Что се бывшее сыну Киссову, еда и Саул есть во пророцех? Егда возгордев и пождав Самоила, якоже заповеда ему, и коснуся неприкасаемых, и вознесе всесожжение, тогда и царьство его разрушися и отъятся. И во царя место вождь наречеся, и Дух Господень отступи от Саула, и даваяше дух лукавый от Господа. Егда же второе сотвори вознести жертву, от Малик (л. 346)[1221] возвратився, и архиерея Господня уби и прочих 80 священников, тогда от Бога и сам осужден, со всем родом его побиен быти, якоже и бысть. Тако и Соломон, от исперва благочестив бысть, но конец жития не подобен юности соверши.

Тако несть чюдно и государю царю, от исперва по помазании елея имети Святаго Духа, якоже и преже бывше мнози царие благочестивии и потом бывше злии, отступницы и гонители и мучители, о них же повествует книга летописная.

Тако и государь царь, аще от исперва был милостив, кроток, благопослушлив, ведаем и хвалим, а еже ныне явился противе во всем священному (л. 346 об.)[1222] Евангелию, Духа Святаго обезчести, правила святых апостол и святых отец и всех благочестивых царей и великих князей законы и уставы, преданыя церкве, испроверже. И елико отец ево государев царь и великии князь Михаил Федорович всеа Русии со отцем своим великим государем святейшим кир Филаретом, патриархом Московским и всеа Русии, исправили и обновили и утвердили, все до конца ни во что положи. И елико сам от исперва быв благ и кроток и милостив, исправи и устави, все ни во что положи, забыв страх Божии и святыя Его заповеди. Господу глаголющу: Аще вы в словеси Моем пребудете, воистину ученицы Мои будете (л. 347)[1223] и разумеете истину, и истинна свободит вы. Тако и всяк, не пребываяй в словеси Божии, несть ученик Христов, ни разумеет истины, ниже свободен есть от истины. И паки Господу глаголющу: Аминь[1224], аминь, глаголю вам, яко творяй грех, раб есть греху, раб же не пребывает в дому вовеки, сын пребывает вовеки. Аще убо сын свободит вы, воистину свободни будете. Явно есть, яко их же не свободит, не будут свободни. Паки Господу глаголющу: Веруяй[1225] в Сына, имать живот вечный, а иже не верует в Сына, не узрит живота, но гнев Божии пребывает на нем. Паки Господу глаголющу: Аминь, аминь, глаголю вам, яко слушаяй (л. 347 об.)[1226] словесе Моего и веруяй пославшему Мя, имать живот вечный и на суд не приидет, но прейдет от смерти в живот. Явно есть, яко не слушаяй словес Господних, ниже веруяй пославшему Его, не имать живота вечнаго, ниже может приити от смерти на живот.

Господу глаголющу: Се же есть воля пославшаго Мя, да всяк видяй Сына и веруяй в него, имать живот вечный, и воскрешу его Аз в последнии день. Всяко и не веруяй в Сына, не воскресит тех Господь в последнии день, по писанному: Не воскреснут нечестивии на суд, ниже грешницы в совет праведных. Господу глаголющу: Аминь, аминь, глаголю вам, аще кто слово (л. 348)[1227] Мое соблюдет, смерти не имать видети во веки. Явно есть, яко аще кто и не соблюдает словес Божиих, не избавится смерти вечныя.

Видели, колико добро есть слушати словес Божиих и заповеди соблюдати. Таковым Господь обеща живот вечный, и воскреснет в последнии день, и смерти не имать видети вовеки. И колико зло есть преслушати заповеди Божия, яко гнев Божии пребывает на них, ниже имать преити от смерти на живот, ниже имать воскреснути в последнии день, ниже имать наследовати живота вечнаго. Сия вся государь царь презре и не страшится. Аще ли кто возглаголет, яко соблюдает (л. 348 об.)[1228] государь сия вся, и аз к таковым реку. Господу глаголющу: Аще кто любит Мя, слово Мое соблюдет. И паки: Имеяй заповеди Моя и соблюдая их, то есть любяй Мя. Аще заповеди Мою соблюдете, пребудете в любви Моей. Которую ли заповедь? Сие есть заповедь Моя, да любите друг друга. И паки: По сему познают вы, яко Мои ученицы есте, аще любите друг друга. И се всем повсюду ведомо, яко государь царь не любит Господа, понеже не хранит заповеди Его, ниже есть ученик Христов, понеже не любит нас.

Господу свидетелствующу: Не любяй Мя, словес Моих не соблюдает. И паки: Ненавидяй Мя и Отца Моего ненавидит. (л. 349)[1229] И[1230] не любяй брата своего, пребывает в смерть. Всяк ненавидяй брата своего, человекоубиица есть. И[1231] весте, яко всяк человекоубиица не имать живота вечнаго в себе пребывающа. Аще ли кто речет, яко люблю Бога, а брата своего ненавидит, ложь есть. Ибо не любяй брата своего, его же виде, Бога, Его же не виде, како может любити? И сия заповедь имамы от Него, да любяй Бога, любит и брата своего. Благотворяй[1232] от Бога есть, а злое творяй, не веде Бога.

Что же есть благотворение государево? Се ли есть, еже восхити на ся чин священства? Ино бо есть священства чин и ино царства, якоже выше писахом много. Но и ныне еще при(л. 349 об.)глаголем[1233], яко священство более есть царства. Священство от Бога есть, от священства же царства помазание.

Аще ли хощеши навыкнути, послушай. Сниде же Господь на гору Синайскую, на верх гора, и возва Господь Моисея на верх горы, и взыде Миосей, рече же Бог к нему, глаголя: Иже, рцы же, приступаяй к Богу, да ся отстоят, да некогда изменит от них Господь. И по мале. Взыди ты и Аарон с тобою, и ту прият Моисей оправдания и суды. И паки сниде к людем и паки рече Господь к Моисею: Взыди ты на гору и стани ту. И взыде Моисей и бе ту на горе 40 днии и 40 нощии. Сходящю же Моисея с горы Синайскии, и обе досце в руку беста (л. 350)[1234] Моисеину. Сходящю же ему з горы, Моисей же не ведяше, яко прославися обличие плоти лица его, егда глаголаше с ним. И зре Аарон и вси сынове Израилевы Моисея, бяше бо прославлено обличие плоти лица его. И се есть освящение Моисеова священства.

Та же Моисей по заповеди Господней освяти и сыны его. Ты[1235] же приведи к себе Аарона, брата твоего и сыны его от сынов Израилевых зрети Мне, Аарона и Надапа, и Авиуда, и Елиазара, и Фамара сыны Аароня. И да сотвориши ризы святы Аарону, брату твоему, на честь и славу. Аарона же и оба сына его, приведеши я пред двери храму свидения и измыеши я водою. И взем ризы (л. 350 об.)[1236] святыя и облечеши Аарона, брата твоего, до земли ризою, и ризу утрьнюю, и слово совокупиши ему, слово ко утрьней ризе. И возложиши на главу его клобук и возложиши доску освящения на увясло. И да возмеши от елея помазаннаго и да возлиеши на главу его и мажеши и. И сыны его приведоша и облечеши я в ризы, и опояшеши я пояся, и возложиши има клобука. И да будет има жрети мне во веки. И до возмеши от крове, яже на олтари и от елея помазаннаго, и да воскропиши на Аарона и на ризу его и на сыны его, и на ризы сынов его с ним. И освятится сам и ризы его, и сыны его, и ризы сынов его. (л. 351)[1237]

Се есть начало священства Верхаго Завета, ни от человек, ни человеком, но самем Богом. И потом распростреся священство во вся дни Израиля.

Егда же Ветхому Закону прииде время исполнитися, якоже Господь свидетелствует: Не приидох разорити закона, но исполнити. Якоже и апостол пишет: Егда прииде кончина лету, посла Бога, Сына Своего единороднаго, раждаемаго от жены. И прочее. О нем же есть писано: Се отрок Мой, его же изволих, возлюбленый Мой, на нь же благоволи душа Моя. Положу дух Мой на нем, и суд языком возвестит. Вы[1238] весте глагол, бывшии по всей Июдеи, начен от Галилеи, по крещении же проповеда Иоанн Иисуса, (л. 351 об.)[1239] иже от Назарета, яко помаза Его Бог Духом Святым и силою, иже прииде, благодетелствуя и исцеляи вся насилованныя от диавола, яко Бог бяше с ним.

Се священства Христова показание есть. И паки: И прииде, рече, в Назареф, идеже бе воспитан, и вниде по обычаю своему в день суботный в сонмище, и воста чести, и даша ему книгу Исаии пророка. И разгнув книгу, обрете место, идеже бе написано: Дух Господень на мне, его же ради помаза Мя, благовестите нищим, посла Мя. И прочее. И согнув книгу, отдав слузе, седе. И всем в сонмищи очи бяху зряще на нь. И начат глаголати к ним яко: Днесь збысться во ушию вашею. И вси (л. 352)[1240] свидетелствоваху Ему и дивляхуся о словесех благодати, исходящих из уст Его. Се же явно есть, еже рече Господь: Дух Господень на мне, его же ради помаза Мя, священства совершение и еже седети и глаголати со архиереи. Аще не бы священник Христос был, не бы места имел архиереискаго и председания и слова учение. Аще и не суть от колена Левиина, но зависть бесовския и тогда не умолча о худородстве Христове. Глаголаху бо: Не се ли есть сын Иосифов, ему же мы знаем отца и матерь? Якоже и днесь глаголют о нас, смиренных: А кто он есть? Мы знаем, каков он был, и мы его и избрали.

Пишет же ся и во истории евреина (л. 352 об.)[1241] некоего, яко обычай бе июдеом в церкви число имети по 22 священников. И тако свиток учинен, лежаше в церкви, да егда от них един умрет, тогда вместо избираху иного. И по освящении написоваху имя его в книгу, и отца и матерь его. И егда вниде Христос по обычаю в день суботнии, якоже выше писано есть, и в то время един от 22 священник умре. И овии глаголаху сего, овии глаголаху иного. И един архиерей рече, яко не имать ин быти, развее Иисуса, сына Иосифова, аще и не суть от колена Левиина, но от Июды. И тако рукоположиша и даша Ему книгу Исая пророка, якоже есть выше писано. И посадиша Его на архиерейстем (л. 353)[1242] месте, о нем же апостол пишет. Аще убо совершено левитском священством бы было, людие бо на нем взаконени быша. Почто еще требе по чину Мелхиседекову иному востати священнику, а не по чину Ааронову глаголатися? Прелагаему убо священству по нужди и закону пременение бывает. О нем же глаголются сия: Колену иному причаститися. От него же никто же причастися ко олтарю, яве бо, яко от колена Июдова восия Господь наш. Онем же колене Моисей о священстве ничесо же глагола, и лишшее еще яве, яко по подобию Мелхиседекову востанет священник ин, иже не по закону заповеди плотския, но по силе живота неразрушеннаго. Свидетель(л. 353 об.)ствует[1243] бо яко: Ты еси священник по чину Мелхиседекову. И по мале. Закон бо человеки поставляет архиереи, имущая немощь, слово же клятвеное, еже по законе, сына вовеки совершена. И аще не был архиерей Господь наш Иисус Христос, не бы из церкви, взем бич, изгна продающыя и купующыя во церкви, глаголя: Храм Мой храм молитвы. Вы же сотвористе его вертеп разбоиником. Яко и ныне святая великая церковь бысть вертеп разбойнич. И аще кто, Христову ревность восприемше, изгонит, аки бочом, законом заповеди, и ныне безгрешно есть. И о Христове архиерействе до зде.

Та же Христос рукоположи святыя свои ученики и апостолы, (л. 354)[1244] глаголя: Приимите, рече, Дух Святый, им же отпустите грехи, отпустятся им, и им же держите, держатся. И се яве Господь рукоположил святых апостол. Приятие Святаго Духа не ино что знаменует, точию Божественыя благодати и власти преподаяние, сего ради и рече. Шедше, убо научите вся языки, крестяще их во имя Отца и Сына и Святаго Духа, учаще их блюсти вся, елика заповедах вам. И иже веру имет креститися, спасен будет, а иже не имет веры, осужден будет. Се есть священническия власти деяние. Та же рече: Знамение же, веровавшим сия, последуют, именем Моим бесы ижденут, языки возглаголют новы. И прочее. И паки: Приимите, (л. 354 об.)[1245] рече, силу, нашедшу Святому Духу на вы. И паки: Бысть, рече, внезапу с небесе шюм, яко носиму дыханию бурну, и исполнь весь дом, идеже бяху седяще. И явишася им разделени языцы яко огнени, седе на едином когождо их, и исполнишася Духа Свята. И по сошествии Святаго Духа на апостолы, разделиша верховнии апостолы страны и метнуша жребии, якоже пишет: И кождо идоша во свою страну. И по словеси Божию учаще и проповедающе всюду, Господу поспешствующу. И по избрании кождо в своей части рукоположиша седмьдесят апостол, якоже писание свидетелствует Никифора Калиста в книзе второй (л. 355)[1246] во главе 35, яко Петр апостол Марка Евангелиста рукоположи во Александрии. Таже Андрей апостол постави Стахию апостола, его же Павел апостол воспоминает во епистолии к римляном, первый Византии епископом. Сам же верховный апостол в проповеди трудися, еже пишется в книгах, яко проходя некогда, и Киевское место, минуя, благослови и водрузи Божественый крест Христов. Таже и Великии Новград благослови. И тако святыми апостолы по местом и градом рукоположишася епископи.

По преставлении же святых апостол распространися евангелская проповедь и вера Христова всюду во вселенную по Писанию: Во всю землю изыде вещание их и в концы вселенныя глаголы их. (л. 355 об.)[1247]

И тако благодатию Святаго духа устроишася первопрестолства архиерейския пятеры: Римское, Константинополское, Александрийское, Антиохийское и Иерусалимское. Яко человеком телеси единогласие имети и едину веру содержати под единым наставником спасения нашего и главою Иисус Христом. И убо от исперва верховнейшии бе папа римскии, и егда папа умре, и тогда советом и избранием четырех вселенских патриарх поставляшеся ин вместо умершаго на апостольский престол. Такожде, егда которому от четырех патриарх преставашуся, абие советом папы римскаго и триех патриарх избранием четвертый патриарх по(л. 356)ставляшеся[1248]. Егда же римскии папа в ересь впаде, и тогда папа от четырех вселенских патриарх от обычнаго поминания извержеся, и по нем первенство имея Константинополскии и вселенскии патриарх.

Егда благоволи Бог по пророчеству и благословению верховнаго Андрея апостола свету восияти в Русох евангелския проповеди, в лето от воплощения слова Божия 886-е при блаженнейшем Фотии патриарсе Царяграда, при царе гречестем Василии Македонине по прошению великаго князя Владимира Киевского и всеа Росии присла патриарх Михаила митрополита, мужа свята, к Киеву граду и той просвети святым крещением и на(л. 356 об.)учи[1249] русов вере Христове. И по преставлении Михаила митрополита един по единому поставляхуся на Рускую митрополию в Цареграде от Вселенскаго Константинополскаго патриарха. И потом грех ради Греческому царству, гордости ради падшу, по писаному: Всяк возносяися, смирится, и попущением Божиим туркам власть приемшим. И невозможно стало за тесноту пути во Царьград на Рускую митрополию ко Вселенскому патриарху отходити поставления ради. И по прошению Руския митрополии митрополита и всех архиерей вселенстии четыре патриархи, единою посланием согласившемся, даша благословение и власть (л. 357)[1250] по правилом святых апостол и святых отец избиратися и поставлятися на Рускую митрополию своими епископы, якоже и сами тии вселенстии патриарси чин и устав во своих епархиях прияли, от своих епископ избрание и поставление приемлют. И тако и грамотами утвердиша. И бысть до лета 7097-го году.

По Божественому же смотрению в лето 7097-го прииде во царствующии град Москву Иеремии, архиепископ Царяграда и вселенскии патриарх, и с ним Моновасиискии митрополит Иерофей и Еласонскии архиепископ Арсении во царство благочестиваго царя и великого князя Феодора Ивановича всеа Русии. Их же благочестивый царь и архиереи в царствующии град прияша с радостию (л. 357 об.)[1251] и с достоиною честию. И разсмотрив, Вселенскии патриарх, яко царство христианское несть инуде пространнее развее царствующаго града Москвы, приложи царю и митрополиту слово, яко да устроится в царствующем граде Москве патриаршескии престол во святеи велицей церкви на лучшее христианское благохваление. И бысть царю и архиерею в любовь и всему освященному собору. И по малех днех совершается слово се делом и бывает по избранию Вселенскаго патриарха Иеремия Константинополскаго и иже с ним и всех руских архиерей области и советом благочестиваго царя, бывает царствующаго града Москвы (л. 358)[1252] и всеа Русии Иов митрополит наречен и освящен благодатию Святаго Духа святеишии патриарх царствующаго града Москвы и всеа Русии в лето 7097-е индикта 2-го. Якоже имать деяние о сем болшее свидетелство в книге правил святых апостол и святых отец московския печати, нареченной Кормчей.

И по отшествии святейшаго Иеремия Константинополскаго патриарха, еже и достигшю ему на свой стол в Царьград, совет сотвори по умолению и прошению благочестиваго царя и великаго князя Феодора Ивановича Московскаго и всеа Русии со всеми патриархи вселенскими и митрополиты и архиепископы и епископы прислали ставленую грамоту, то есть (л. 358 об.)[1253] хрисовул патриаршескии, им же, хрисовулом, повеле и извести, да той же архиепископ Московскии господин Иов будет пятыи патриарх, и имать патриаршеское достоинство и честь и сочетается и метрится с прочими патриархи на вся веки. Но и по смерти хотящим поставленым быти у Московскаго собора первым архиереом патриархом именоватись повелеваем по правилу и образу бывшему, наченшемуся от патриарха сего Московскаго господина Иова, во Святом Дусе возлюбленаго брата и сослужебника нашего смирения. На сем бо и настоящии соборный свиток бысть во всегдашнее (л. 359)[1254] утвержение. В лето 7098-е маия во 8 день. Подписаша же ся три патриархи вселенския, Константинополскии, Александриискии и Иерусалимскии, с ними же инех святителей 79.

Такожде и в лето 7127-м по благочестивом государе царе и великом князе Михаиле Феодоровиче всеа Русии блаженныя памяти святеишии Феофан патриарх святаго града Иерусалима и всеа Палестины с преосвященными митрополиты и архиепископы и епископы о Святем Дусе избраша блаженныя памяти Филарета патриарха, но не без свидетелства, но обретше в газофилакии оную же грамоту Иеремия патриарха с прочими патриархи вселенскими. И тако рукополо(л. 359 об.)жиша[1255] святейшаго Филарета патриарха по благодати Святаго Духа, а не по царьскому избранию, якоже свидетелствуют оныя святыя грамоты. Аще ли бы по царскому избранию избраны, то не бы утаилось в грамотах святейшаго Иеремия патриарха Константинополскаго и с прочими вселенскими патриархи и Феофана патриарха Иерусалимскаго. Но и завет свой заповедал благочестивому царю государю и великому князю Михаилу Феодоровичю всеа Русии самодержцу: И по благодати, данней нам от Святаго Духа, завещаем сему, яко да хранит и соблюдает ко оному новопоставленному во святейших Филарету Никитичю, Божиею (л. 360)[1256] милостию патриарху Московскому и всеа Русии, любовь, милость, щедроты благое подаяние, наипаче же святительства ради в духовных вещех повиновение, в телесных же послушание и покорение, и всегда имети главу и пастыря и отца чадолюбива, и о спасении того промышляюща и пекущася, якоже лепо по превосходящему святительству. И тако возмогоша в таковых спешнеиша того сотворити, еже о нем ходатайствовати и о святем его царствии молящася к Богу, милостива того обрести, понеже и ваще царьское благородие человек еси и тоюжде плотию обложен, якоже и вси.

Таже по сем и всем велможам наказа повиноватися, (л. 360 об.)[1257] якоже и Христос и святый апостол Павел, глаголя: Вас убо, о благороднии велможи и честнии, в сигклите пребывающии, соблюдащии царево здравие и пребывающии в воинстве и управляющии царския потребы и все, яже о Христе, многонародное христолюбивое множество, воспоминаем и завещаем, со всяцем покорением священному сему мужу, ныне же благодатию Божиею вашему отцу и учителю и вожду вашего спасения, предложити тому душа ваша со всяцем смирением и послушанием, и ничесо же о таковом безместно что помышляти, но якоже самому владыце Христу служаще повиноватися по Божественному того речению: Слушаяй, рече, вас, (л. 361)[1258] Мене слушает, и отметаяйся вас[1259], Мене отметается, отметаяи же ся Мене, отметается пославшаго Мя. И паки: Иже чтит иерея, чтит вышняго Бога, понеже иереиская честь на Бога восходит. Да аще убо тако к простым иереом завещание и повиновение подобает соблюдати, колми паче ко превозходящим честию, наипаче же сему ныне святопомазанному превысокому патриарху, отцем отцу и крайнему святителю. Его же сан святительства не точию зде, но и в самом небеси мощен есть по божественому Спасову речению: Иже бо аще свяжете, рече, на земли, связан будет на небеси, а иже разрешите на земли, на небеси разрешено будет. (л. 361 об.)[1260] И да никто же, речет, яко ко апостолом единем сия реченна суть, но и ко всем, хотящим быти преемником сих, иже убо от апостол и доныне хранимо и соблюдаемо ненаветно в православных, ему же милостивый Христосе буди и соблюдатися и хранитися и до втораго твоего и страшнаго пришествия, паче же и молю соблюдатися сему непременно и до скончания века. Самому же превысочайшему патриарху поставляти сущих под ними росииския области митрополитов и архиепископов и епископов и прочих освященных муж, якоже церковь прият по апостолскому преданию и святых отец правилом. К болшему же (л. 362)[1261] утвержению ныне нами новопоставленаго патриарха Филарета Никитича и прочих, хотящих по нем быти, аз, смиренный Феофан, Божиею милостию патриарх святаго града Иерусалима и всея Палестины, и митрополиты и архиепископы и епископы и честнии архимандриты и игумены посудихом сие наше писание написати на хартии и подписати руками нашими и печатми затвердити, яко да будет к поставлению патриаршества свидетелствованно и утверженно во веки и никим же пременяемо. Аминь. Писана в царствующем граде Москве лета от создания мира 7127-го месяца июня.

Видели, совопросниче (л. 362 об.)[1262] неправедный, како священство начася, не от человек, ни человеком, но от самого Бога, и древнее и нынешнее, а не от царей, якоже ты глаголеши, но паче от священства царство произыде. И ныне есть, якоже устав царскаго поставления свидетелствует, священство всюду пречестнейши есть царства, якожде выше назнаменах от Божественаго писания и ныне паки речем.

Царство, аще и от Бога дадеся в мир, но во гневе Божии, и се чрез священство помазуется чювственым елеом, священства же помазание Святым Духом непосредствене, якоже Господь наш Иисус Христос помазан на архиереиство, яко выше сего писано есть такожде и святии апостоли. Сего ради (л. 363)[1263] на помазании архиерейства архиереи, приемше святое Евангелие, распростерше свыше держат над главою поставляющагося архиерея.

Молитва.

Владыко, Господи Боже наш, законоположивый нам всехвалным си апостолом Павлом степенем и чином устав, еже работати и служити честным и пречестным ти таинам во святом жертвенице, первое апостолы, второе пророки, третие учители, сам владыко всем и сего нареченнаго сподобашагося подоити Евангелскому игу и святительскому достоинству рукою моею грешнаго и с сущими служители, с митрополиты и со архиепископы и епископы и осиянием и силою и благодатию Святаго Твоего Духа. И паки вся молитва. (л. 363 об.)[1264] Господи Боже наш, заеже немоши человеческому естеству Божества существо понести, сего ради Твоим смирением подобострастным нам учителя уставив твой предержащих престол и яко подобники твоя на величествии престоле твоем седяща, воеже приносити тебе жертву и приношение о всех людех твоих. Ты, Господи, и сего явленнаго строителя святительския благодати сотвори быти подобника Тебе, истинному пастырю, положшаго душю Свою о овцах Твоих, наставника слепым, света сущим во тме, наказателя безумным, светилника в мире, яко да устроит душя ввереныя ему в насто(л. 364)ящем[1265] сем житии и предстанет судищу Твоему непосрамлен и великую мзду приимет, юже уготовал еси пострадавшим о благовестии Евангелия Твоего.

Слышели, безумне, коликая дарования архиереи имут от благодати Святаго Духа, яже священное слово показа, яко архиереи подобники Божия. Почто Божиих подобников порицаеши и на величии престола Божия седящих уничижаеши, и пастыря словесным овцам отбегаеши, наставника слепым отреваешися, света сущим во тме зрением не услаждаешися, наказателя безумным отметаишися? Яже ти Господь заповеда: Слушаяй вас, Мене (л. 364 об.)[1266] слушает и отметаяися вас, Мене отметается. Светилника суща в мире лишаешися, могущаго ему души ввереныя в настоящем сем житии представити судищу Христову не посрамлены и великия мзды достоиных показати. Аки немощна уничижаеши, яже Божественыи апостол свидетелствует, глаголя: Братие, повинуйтеся наставником вашим и покаряйтеся, яко тии бдят о душах ваших, аки слово воздати хотяще. Сия бо власть толико гражданския лучши есть, елико земли небо, паче же и много вящше. Наше бо, рече, житие на небесех есть, и живот наш тамо сокровен со Христом в Бозе, и почести тамо (л. 365)[1267] и течение о сущих тамо венцех, ниже бо разоряется по скончании сей живот, но тогда сияет болше. Сего ради не точию князей и местных, но и самых, иже диадимою обложенных болшую прияша честь, тиущих сию власть, аки в болших и над болшими предворяюще человеки. И сия тако, совопросниче, а не инако свидетельствует истиною и Божественым писанием, а не якоже ответотворец ваш лестныи лстит, к нему же ныне паки приидохом. О них же и вас Божественый апостол издалека предзрев пишет, глаголя: Дух же явствене глаголет, яко в последняя времена отступят нецыи от веры, внемлюще духовом лестчим (л. 365 об.)[1268] и учением бесовским в лицемерии лжесловник сожженых своею совестию. И паки, суть бо мнози непокориви суесловцы и умом прелщени, их же подобает крепце обличати и уста их заграждати. иже вся домы развращают, учаще, яже не подобает, сквернаго ради прибытка. О коемждо ли апостол глаголет: Дух явствен глаголет и прочее, о вас. Кому же ли внемлюще духовом лестчим и учением бесовским в лицемерии лжесловеснем сожженых своею совестию, Газскому митрополиту умом прелщеному, иже учит, яже не подобает сквернаго ради прибытка своего трапез пространных и ризнаго украшения, (л. 366)[1269] еже имать наг быти в день брака и не имеяй брачныя одежды, якоже самыя ево лестныя и бесовския ответы имут обличити. Глаголеши, ответотворче, на воле то есть цареве почитати которых хощет, а наипаче егда ради достоинства и чести церковной делают. Где, ответотворче, писано есть о сих, еже царю почитати которых хощет? Лепо есть царю почитати подданых слуг своих, их же хощет, а не о архиереи се речено есть. О архиереи же инако рече Спас: Слушаяй, рече, вас, Мене слушает, и отметаяйся вас, Мене отметается. И паки апостол засвидетелствует, глаголя: Братие, повинуйтеся наставником вашим (л. 366 об.)[1270] и покаряйтеся. И паки: Без всякого прекословия меншее от болшаго благословляется, како же может царь, его же хощет почитати таковых, котории от самого Бога славою и честию венчали, и честь и слава паче царства, елико небо земли честнейши есть, якоже свидетелствуют богословцы. Разсмотри, самомниме, чести посредство небеси и земли, кто убо свидетель. Сам Бог глаголет: Небо Мне престол есть, земля же подножие ногама моима. Такоже и о пространстве небеси разумети есть, якоже капля дождя от великия тучи, то есть земля от небеси мерится, тако и царство меншится от священства. (л. 367)[1271] Царь аще и власть приял от Бога в маловременном сем царстве почтити или уничижити кого, но не пребывает ввек, и Бог того разрешити может и время и царствия пременением разрешает, и на самого того царя суд Божии настоит. Аще почтил, его же почтил благозаконно, а не по своей любви, и уничижил, его же уничижил по закону заповедей, а не по своей ненависти. Священник же аще кого свяжет на земли, ни сам Бог разрешит того, якоже свидетелствует, будет, рече, связан и на небеси.

Зриши ли, яко небеснаго жителства достойнаго свяжет священник на земли, Бог того на небеси (л. 367 об.)[1272] не разрешит. О грешницех связанных инако Господь показа и не просто. Связавше ему, рече, руце и нозе, вверзите во тму кромешную, ту будет плач и скрежет зубом.

Ты же, лицемере, како глаголеши чрез Божия заповеди почитати и непочитати на воле есть цареве. Где есть то писано? Новозаконие бесовское вводиши, а не закона Божия. Господь равночестна себе архиерея почте, глаголя: Слушаяй, рече, вас, Мене слушает, и отметаяйся вас, Мене отметается, отметаяи же ся Мене, отметается пославшаго Мя. И паки глаголеши: Однако же и тыя, которыя приимают честь от царя, надобно, чтоб (л. 368)[1273] бережно и опасно приимали оберегали. Надобно тем, которые честь от царя приемлют, чтоб бережно и опасно приимали, то есть мирским всяким подданым его, а не и нам. К нам же и самому носящему диадиму дары носити по долгу есть и во всем повиновение, якоже Господь заповеда: Слушаяй вас, Мене слушает. И прочее.

А ты, малоумне, Божию благодать хулишь, данную нам Святым Духом и низводиши покорятися царем, якоже и Навуходоносору и образу златому, якоже пишется.

Тогда[1274] приступиша мужие халдейстии и насочиша на июдея, якоже ты ныне, и отвещавше, реша, царю (л. 368 об.)[1275] во веки живи. Ты царю заповеда заповедь, весь человек, иже аще услышит глас трубы и прочаго мусикийскаго рода, да падет и поклонится телу златому. Аще ли же ни, да ввержен будет в пещь, огнем горящую. Суть бо мужи иудеи, их же постави над делы земля Вавилонскии Седрах, Мисах и Аведнаго. Мужи тии не послушаша заповеди твоея, царю, и богом твоим не служат и телу златому, еже постави, не поклоняются. Тогда Навуходоносор с яростию и гневом рече: Привести Седраха, Мисаха и Аведнаго. И мужи тии приведени быша пред царя. Отвещав же Навуходоносор и рече (л. 369)[1276] им: Аще воистину Седрах, Мисах и Аведнаго богом моим не служите и телу златому, еже поставих, не поклоняетеся, ныне убо аще есте готови, да яко услышите глас трубы, пищалии же и гуслии, цевница же и прегудница, и писк и всего рода мусикийска, падше, поклоняйтеся телу, еже сотворих. И аще не поклонитеся, в той год ввержени будете в пещи огнем горощю. И кто есть Бог, иже измет вы от руку моею. И отвещаша Седрах, Мисах и Аведнаго, глаголюще царю Навуходоносору: Не требуем мы о глаголе сем отвещати тебе. Есть бо Бог наш на небесех, ему же мы служим. Силен изъяти (л. 369 об.)[1277] ны от пещи, огнем горящия, и от руку твоею избавити ны, царю. Аще ли ни, вестно дати есть царю, яко богом твоим не служим, и телу златому, его же постави, не поклоняемся.