Александр Пушкин

* * *

Заз гьайиф туш куьн, йисар зи гатфарин,

Муьгьуьббатдин хиялраваз авахьай,

Заз гьайиф туш куьн, эй сирер йиферин,

Гьевеслу тир кфилдилай алахьай.

Заз гьайиф туш куьн, вафасуз дустар зи,

Гур межлисар ва фейжанар атирлу, –

Заз гьайиф туш куьн, чиг-ченги рушар зи, –

Машгъулатар хуш амач_г яз фикирлу.

Гьинава куьн, хуш-хияллу аямдин

Декьикьаяр, рикIин динжвал, дидар зи?

Гьинава цIай, ифей накъвар илгьамдин?

Хъша садра мад, гатфарин йисар зи!

* * *

Зитилисим, хуьх вуна зун,

Хуьх зун гъуьрч зал ийир юкъуз,

Зун гьайифрин есир юкъуз:

Пашман чIавуз ганай заз вун.

Къарагъдайла, хьана азгъун,

Гур лепеяр гьуьлерин зал,

Къверла тIурфан циферин зал,

Зи тилисим, хуьх вуна зун.

Хелветди рикI ийиз умун,

Яд уьлквейра хьайи чIавуз,

ЦIун женгериз фейи чIавуз,

Зи тилисим, хуьх вуна зун.

Пак ва ширин ягъалмиш хьун,

Суьгьуьрлу рагъ гуьгьуьлдин зи...

Квахьнава ам, гъафилди зи...

Зи тилисим, хуьх вуна зун.

Фикиррикди тахьуй бархун

РикIин хирер садрани мад.

Сагърай, умуд; ксус, мурад;

Зи тилисим, хуьх вуна зун.

* * *

Зи рикIема ажеб макъам:

Атанай вун ислягьдиз,

Са шикил хьиз уьтери-хам,

Гуьзелвилин аллагь хьиз.

Квахьна умуд, дерт-гъам чIугваз

Чалпачухда мидаим,

Вун ахварай аквадай заз,

Ви ван къведай милайим.

Физвай йисар. ТIурфанри терс

Зи хиялар чукIурна,

Ви гуьзелвал, милайим сес

За рикIелай ракъурна.

Дустагъда зи физвай йикъар

Сугъулдиз, экв авачиз,

Иман, илгьам, уьмуьр, накъвар

Ва муьгьуьббат галачиз.

Ингье мад – зи руьгь я хуррам:

Атанва вун ислягьдиз,

Са шикил хьиз уьтери-хам,

Гуьзелвилин аллагь хьиз.

Ргазва рикI, бахтлу я ам,

Акваз цIийи гьакъикъат:

Чан хтанвай иман, илгьам,

Уьмуьр, накъвар, муьгьуьббат.