Назим Хикмет

КЪАЙНАР БУЛАХ

Къайнар булах, ви къайи цив

Гатун зегьем хьана ажуз.

Вал зи ярди эцигна сив –

Милайим тир кузвай кьве пIуз.

Бес вучиз вун элкъвенач цIуз?!

ЦIАЙ КУТУН ТАВУР ПIАПIРУС

Ам, мумкин я, рекьида къе.

Гуьлледи руьгь чими ийич.

Хъфена ам, кушкуш ийиз:

кичI квач зак гьич.

– Къала пlaпlpyc.

– Ma...

– ЦIай?.. Бес цIай?

– Гвач... Гуьлледи кутада цIай.

Хъфена ам, лигим хьанвай гьулдан хьтин,

вилера – къай.

Белки, ам ярх хьанва чилел,

Амма вичин авуна кар.

Хуралла хер, сиве пlaпlpyc,

куьчеда гар,

Туьрк чIалай.

Лев Ошанин

* * *

Дяведин цIа ва я ислягь девирда,

Дустар галаз ва я абур галачиз,

Гьатда садра чун ажалдин суьгьуьрда,

Амукьда чун са чарани амачиз.

Эгер ваз чир хьайитIа, гьи патахъай

Гьахъсуздаказ гьужумда вал ажалди,

Яшамиш хьухь, кичIе жемир адахъай,

Агъузмир кьил, гьахьмир пашман хиялдиз.

Яшамиш хьухь хатавилиз нифретиз!

Бирдан ажал туьш хьана, вун – гьаяман! –

Ярх хьайитIа векьиз ва я живедиз,

Лугьуз алахъ:

– Зал гьеле чан алама.