Леонид Мартынов

СИФТЕ ЖИВ

ЭкъечIна ам няниз фад:

– Гуъзетмир зун. Кар ава...

Ацукьзавай сифте жив.

Лацу куъче.

Гар ава.

Киоскда са рушавай

Хъвана ада чехирни.

Фикирзавай: «Кар ава...

Зиди туш и тахсирни».

Зенгна кIвализ:

– Ксанва?

– Ахваривай зун тух я.

– Ксанвач? Бес вучзава?

Жавабна:

– Зун ашукь я!

...Сятдин цIикьвед жедайла,

Инихъ-анихъ тамашиз,

Пакамахъ ам хтана,

Гьисс ийиз вич тама хьиз.

Виче чIулав чихеяр,

Тарар чIулав тан галай,

Вири – чIулав пердеяр,

ЧIулав пипIер тIал алай,

Креслояр чIуп-чIулав

Лал-кис хьанвай тама хьиз.

Руш авай кьил агъузна,

Гадани – ухьт алахьиз.

Бирдан адаз акуна:

Рушан къизил чIарара

Чуьнуьх хьанва лацу тил,

Хьел хьиз къаюн авара!

Тилдал,

Гила даим хуш,

Гададин пIагь алкIана,

Вичин йифехъ нин къизил

ХаржнатIа,

Къе кьатIана.

– Вуч я ам? –

Руш рахана,

Вилер хъуьрез, зурзаз сив,

Играмидаз гадади

Жаваб гана:

– Сифте жив!

Урус чIалай,

Евгений Евтушенко

* * *

Манасузвал – я ажузвал

кIула кьадай девирдин пар.

Эхь, хуш я заз зирингсузвал,

хиве аваз жавабдар кар.

Манасузвал – тухвал я ам.

Чарадан гъам жен вазни гъам.

ВегьейтIа на хирел шекер,

кьелелайни куда бетер.

СЕРГЬЯТ

Гьар шейиниз сергьят ава: ашкъидиз,

эхунизни, акьулдизни, гьакI рикIиз,

гьакI сергьятсуз гегьеншлухриз-чуьллериз,

Гьавая ви, шаир, рикIи незва рикI,

сергьят ава, лугьуз, яшдиз, гьиссериз:

айиб жер кар авач, жемир вун гъерикI.

Анжах на кваз кьамир бязи угърашар:

жедай кьван за кхьена, гьакI фарашна, –

лугьуз, кьуру хъвер ийизвай явандиз.

Вун, сергьятдал алатIани, киснавач.

Чир хьухь, сергьят гьар генийди гьиссзава

са угърашвал сергьятсуз я инсандин.