Гьидаят

АВТОПОРТРЕТ – 83

Зангезурда хана зун.

Ереванда хьайиди я яшамиш.

Рекьида зун

Бакуда.

Хьана закай къизилдин сим – сару сим –

Амукьда зун гъамлу пашман мани яз.

Заз кIандай хьи, хци зигьин жагъана,

Нетижа кьаз жедай фейи уьмуьрдин,

ЧIулав йикъар – лацу йикъар терезда

Эцигна хьиз, абур дуьздиз алцумдай,

Шадвилерни хажалатар гьисабдай...

АкI тахьайт1а, чна тухвай уьмуьрдин

Вири вахтар гьакьда кьвед-пуд гафуна.

Хьана закай къизилдин сим – сару сим.

Кьейидалай кьулухъ гафар герек туш.

Гьат хъувуртIа са гъаб цlapap лайихлу,

Гурай абур газетда

Сифте сефер зи шиирар чап авур.

Бес гьикI хьурай эхиримжи зи кIвал-югъ?

Гила мад вуч лугьуда?..

Гзаф дар я Бакуда...

Зангезурда гегьенш я...

Сурарни лап мукьув гва.

Хайи хуьряй экъечIзава рухваяр...

Зунни гьакI я...

Эгер садра хъфейтIа,

Иви кIвахьиз шеда рикI.

Ана чIехи бубайрин руьгь къекъвезва.

КичIе я заз

ГъвечIи хуьруьн чIехи сурар

Терс кIвачерик рамагрин

Акатна хьиз, дарбадагъ жез,

Тар-мар жез,

Михьиз квахьна,

РикIелайни алатиз.

Заз и уьмуьр чир хьана

Суфатрилай, чинрилай,

За кIелай кьван ктабрай,

Гьуьрмет хвейи хъенрайни

Шегьеррайни хуьрерай.

Зи уьмуьр – им пуд цIар я зи баяддин

Куьтягь тахьай лагьана...

И цlapapa руг авай кьван рекьерин

Гелер ава къекъверагрин кIвачерин,

Жагьуриз кIанз алахъунрин,

Шадвилерин, хирерин!

... Килигзава зун инлай

Лацу-чIулав йикъариз,

Куьтягь тахьай цIарариз.

Хкажзава бокал за

Эхиримжи йикъан зи

Эхиримжи манидин сагьлугъдай.

За лугьузва: тади ква зак...

Магьлубвили агалкьунрихъ тухуда.

Зи манини гафар зи

Хълагьдай югь,

Акъваз, тади акатмир...