Рашид Рашидов. ЭкъечIрай ви дакIардихъ

ИНСАН

1.

КIантIа цуьквер

ЭкъечIрай ви дакIардихъ

Я лепейри

Авурай гьуьл безетмиш –

Абурал чан

Гъизвай яран шагьвар чиг

Хьанва вич зи

Нефесдикай туьретмиш.

Ц1айлапанар

АватIа цав къарсуриз,

Къалабулух

Кутаз дагъдин синерик –

Зи ашкъини

Къалабулух къалуриз,

Рахазва цав

Ахваравай чилерив.

Гуьгъуьнилай –

Лейсан къвазва баркаван,

Гуьрчегзава

Чим ракъинин нурарин,

Аквачни ваз

И легьзеда авадан:

Ухшамиш я

Саф лейсан зи накъвариз.

Хважамжамни,

Цавун са пад ацIурна,

Хъуьрезва, кьил

Ви дакIарда акIурна.

Ирид рангни,

Налугьуди, къашар я –

Зи велерин

Килигуниз ухшар я.

2.

Къе лагьайтIа,

Ингье – нисин береда,

Гужлу тирла

Чим ракъинин нурарин.

Мукьвабуру

Къуьнералла дередай

Къейи Инсан

Хутахзава сурариз.

Гъам аквазвай

Агаж хьанвай къуьнерал,

РикIерани

ТIал авазвай дустарин.

Ракъинин хъвер

Алай дагъдин синерал:

Дерт-гъам чIугваз

Чидач рехи дагълариз.

Зунни ава

И жемятдин арада,

Жезва туькьуьл

Фикирар зал гьавалат:

И кас – къе икI

Хъфизвайди дуьньядай

Чидайди тир

Заз лап аял чIавалай.

Гьалч жезва тIал

Зи гуьгуьлдин симерал,

Хехери хьиз,

Чуькьуьзва рикI гъамари.

Ракъинин хъвер

Ала дагъдин синерал,

Дерт-гъам чIугваз

Чидач рехи дагълариз.

Къайгъусуз я

Дагълар чпин бинедай,

Амма рикIи

Дерт гъам вичиз чIугуна.

… Рехъ авачир

Вичяй кьулухъ хкведай

Чкадиз къе

Инсан рекье хтуна.

3.

Йиф атана,

Цав ацIайла гъетерай,

Гьарай эвер

Гьатна кIвале къуншидин:

Фад хабар це –

Чи бубайрин чилерал

ЦIийи Инсан,

Инсан хьанва,

БицIиди!

Вири магьле

Нурлу хьана гьасятда,

Дуьнья мадни

Гуя жегьил хъхьана.

Шадвилин хъвер,

Гьевес гьатна гьаятда,

Зани жуван

ЦIийи мани лагьана:

Лагьана за

Гьуьрметдай а бицIекдин,

Атанвай и

Чилел цIийи Инсан яз:

«Азиз бицIек,

Фад чIехи хьухь зирекдиз,

Уьмуьрдинни

Бахтлувилин лишан яз!

Къуй ви къуьнер

Гьяркьуь хьурай, азиз дуст,

Гъилерани

Хьурай къуват кьегьалдин,

Къуй муьгьуьббат

Атурай ви рикIиз, дуст.

Вун Инсан хьиз

Яшамиш хьуй гьалалдиз!

Чин ачух яз,

Гъил ачух яз, пакадиз

Аладрай вун –

Ви гьар са югъ алахьрай!

Ви крарал

Дидедини бубади,

Хайи чили

Мидаим яз дамахрай!»