Даимлухдин рахун

1.

Зун цававай гъетерилай кьакьан я,

Виридалай деринбур я гьуьлер зи.

Гьина,

Ни бес халкьнатIа зи эвел кьил

Зи мидаим Ватан яз?

Гьинаг ятIа эвелимжи чешме зи?

Гьар са асир за зи ирс яз къачузва,

Гьар асирдиз руш я зун.

Ирид цавун аршни я зун, лугьузва,

Лап къадим тир къадимлухдин дегьне я,

Йифен йиф я,

Алатнавай йикъаринни

Алукьзамай кьван йикъарин ирс я зун.

Мескен я зун акьулдиз инсандин,

Эхиримжи, чкIин тийир мескен я!

Гьуьндуьр авай, кьакьан тир!

Зи гъуцар я терезар:

Чилин мичIи чIулаввал,

Ракъинин гур къативал,

Вили цавун миливал,

Терс гьуьлерин къайивал,

ЦIарцIар лацу живерин

Ва багъларин верцIивал.

Акьулбалугъ руьгь я зун,

Дарискъал я заз хсуси экуьна;

Зун уьмуьр я, са къиметдив барабар

Ийида за са асирни легьзе са,

Ам легьзе я нурлувилин са гьетрен

Давам жедай виридалай экуь яз.

Чилин ачух муьгьуьббат

Ва фейжанрин атир яз

Зун дуьньядин дерейра

Пайда хьанвай са сир я.

2.

Океанрин къаюм я зун, даях я,

Тамамвилин лувар я.

Фейи йикъа хквезмай

Йикъахъ галаз ийизвай,

Дяве я зун, акъажун!

Зун уьмуьрдин тIурфан я,

Гатфар я зун, хвешивал,

ЦIийи тумар цазва за, –

ЭкъечIда тум цайивал!

Чилин са пай йифева,

Ахварик ква инсанар.

Муькуь пата кузва рагъ

Нурар хъичиз тапана.

Зун – гургус я, зи душман –

МичIивал я

Вичин тур

Хци ийир экв туьхуьрун паталди!

Заз дакIан я, низ эгер

Хабар туштIа зун хьуникай.

Зун вахтунин рикIе кузва,

Килигзава вилералди асиррин,

Рехъ квадарайбур мад зи патав хкведа,

Зи деринвал кьатIуда,

Завай къуват къачуда.

Зи асирар аквазва заз –

Са-сад къвазна жергеда,

Турунивни къелемдив женг чIугвазва! –

Ихтиярар патал вири инсанрин,

Наз-няметар патал экуь йикъарин!

Гагь-гагь инсан хьиз ава зун рекьевай,

Амма са вахт къведа – игит жеда зун,

Бабек жеда халкь къарагьриз алакьай.

Шад хабар хьиз, занубатдин асирдив

Вугузва цIай Лермонтован шиирдин,

Заз къурхуяр гузва мичIи къуватри –

Закай жезва Сталинград!

Чархачияр ава захъ

Гьар са чIавуз асирра.

Гьабуруз зи ван хьана

Виридалай виликни,

Абуру зи ван агакьарна

Несилрив цIийи.

Къад лугьудай асирда зи чархачи –

Ленин я.

3.

И кьил а кьил авачир

Гур манидин сес я зун.

Адан аваз – метроном я вахтарин.

Зун ракъинин аялвал я,

Экуьвал я вацранни,

Ахвар я зун,

Къаст я зун

Тарарин ва векьерин,

Гьам уьмуьрдин цуькверин

Зун чуьл, даях, веси я,

Океан я дуьньядин,

Гагарин я рекьер атIай гьетерал,

Зун кьилди гьар са кас я,

ВацIун кьадар-кьисмет я,

Авахьзава а вацI даим хурай зи.

За рекьелай шуткунзава ажални,

Чан алайди яшамиш хьуй,

Цуькверини хкажрай кьил,

Зун чил я!

Чил!