Вучиз. .

РикIивайни, заз муьгьуьббат къанвани? –

Галамачни вил гуьруьшдин йикъарихъ?

Я туштIа, заз жув чаради хьанвани?

Я рикIелай фенвани кеф пIагьарин?

Вучиз, вучиз зи рикIелай алатна

Муьгьуьббатдин миже хъвадай йифер гур?

Вучиз жаван муьгьуьббат за барбатIна,

ИчIивилин зинданра тваз гьиссер гур?

Гьайиф! Гьайиф алатай югъ! Гьайиф хьи!

Мегер вири кьенани зи мурадар?

ЦIранани умудар зи, гьуьм-циф хьиз?

Руьгьдин тIалди авуна жал акIадар?

Уьмуьр фена са файдани тахьана –

Тек са рикIин вафасузвал тахсир я.

Гила заз гьикI жедач ашкъи такъана?

Чаравиле яшамиш хьун – эхир я!

ВУН ХТАЙЛА

За фикирнай, зи рикIе цIай туьхвена лугьуз,

Зи муьгьуьббат эхиратдиз хъфена лугьуз.

Вун хтана – рагъ хтана зи чандиз секин,

Зи вилера ашкъидин цIай хъхьана эркин.

Вучтин гуьрчег тIварар гуз ваз, рахайла вав, чан,

Зи ивида муьгьуьббатдин юзана вулкан.

Зи чан тирвал ашкъидин туьнт селлер рахана,

Зи дердина акьуна, ви вилер рахана.

Валай ахьтин аламатдин алахьна хьи нур,

Ви суьгьуьрдин экуьни зун авуна цIурур.

Гьикьван хци ятIани ви вилерин хьелер,

Тух жедач зун атIумиз ви экуьна вилер.

Куьз лагьайтIа, рекьизвай зун на хъувуна сагъ,

Зи уьмуьрдин рекье вун заз я нурлу чирагъ.

АШКЪИ КЪАЗАМАТДА

Зи кIаниди, гунагь жеда, эгер чна

КъалурайтIа сада садав гьиссер чна.

Рехъ гайитIа ашкъидин цIуз кIанивилин,

Куда ада диливилив, къенивилив.

Муьгьуьббатдин хаз хьайитIа хатур чна,

Куз жеда ам чи ивида, гургур кьуна.

Хуьх на ашкъи къазаматда – хура туна,

Хуьх муьгьуьббат мичIивилин сура туна.

ГЬАКI КIАН ХЬАНА КЬИСМЕТДИЗ

РикI, чи уьмуьр физвачни хупI пашмандиз,

Чна лугьуз: «ГьакI кIан хьана кьисметдиз».

РикI, чи уьмуьр физвачни хупI явандиз,

Кьурагь хьанва. Къимет авач минетдиз.

Къацу векьер амач, рикI, чи уьмуьрда,

Я къуьлуьн къаз, ишедайвал марфадихъ.

Чи цав амач гьич булутрин фикирда,

ЧIулав йиф я галайди чи суфрадихъ.

ЦIай хкахьай чад хьиз ава уьмуьр чи.

Чи рикIелай фенва вишриш пешерин.

ЦIара ягъай гад хьиз ава уьмуьр чи,

Атир амач, таъсир амач цуькверин.

Яргъияр гвай ажал хьиз, йиф атанва,

Садлагьана хкахьнава гъетерни.

Вири цавар гъамлувилив ацIанва,

Алатнава цIийи вацран рекьерни.

ВУЧ АМУКЬНА?

Хъфей чIавуз муьгьуьббат вуч амукьна?

Чидач, амма зун рикI кьуна ацукьна.

Зи сабурдин сергьятсузвал акурди

Хъелна закай садра вичи сабурди.

Садлагьана кис хьана зи булахар,

Къурана зи чиг цуькверин чIварахар.

ЗатIни вакай амукьнач заз, кIаниди,

Амукьайди са жув хьана – кайиди.

Амукьайди «хьайивал хьуй» гафар я.

Зи муьгьуьббат агалнавай варар я.