Масад захъ мад вуж ава.

Зун Ви патав атанва къе, я Ребби, рикI ачухиз кIанз,

Гъил къахчун зи гунагьрилай минет ийиз Ваз.

Зи далудал дагълар ала дердерин,

Залан парар ала кимивилерин.

Зун Ви патав атанва къе, я Ребби, Валай гъейри, захъ

Мад вуж ава, куьмекдай заз, я Ребби, тергиз рикIяй гьак?

Са Вун я за даим дуьа ийирди,

Зун рекьелай алуд лугьуз шийирдин.

Зун Ви патав атанва къе, я Ребби! Зи вири мурад –

Жагъурун я Вавай чара, далда са – амни Вун я, Сад.

Зун Ви патав атанва къе, я Ребби!

Яб це, зи рикI кьуранва къе, я Ребби!

За гунагьрин гьуьлелай зи датIана минетзава Ваз:

Я Ребби, заз куьмек ая гьуьлелай элячIиз патаз,

Зи къаст хазвай лепейрал заз четин я,

Намусдин цIай зун курдавай къизгъин я.

Зи гунагьар артух жезва къвердавй, рикI хьанва русвагь,

Кьил какахьна, рекьер квахьна ама зун – са канвай сиягь.

Заз михьи жез кIанзава – зун начагъ я,

Вун гьар са рикI къутармишдай ужагъ я.

РИКIЕРИН ХАНУМ

Ярх жеда вун, ашкъиди эверайла хабарсуз,

Кьурувални рикIерин алатда ви рикIелай.

Вун назикдиз халкьнава, гуьзел я вун кьадарсуз,

Гьар са шит чин акурла, фида вун вич вичелай.

Вун халкьнава есир яз буш хиялрин, мурадрин,

Таништушир инсандихъ ви ашкъи хупI къенида.

Зи кIанивал рикIел гъиз, назиквилин баядрив

КуькIуьрзава цIай вуна ахварра ви кIанидан.

Зи рикIивни гупа-гуп ийиз тазва вуна, руш,

Хъичирзава ал рангар зи хъуькъверал ифенвай.

Зивилерни ялаврив ацIуриз на туна, руш,

Ялаврив, ви суьгьуьрдин къуватдикай куькIвенвай.

Назик, кьезил уьмуьрни ярашугъ я, шагьум, ваз,

Яшамиш хьухь, амукьа вун рикIерин ханум яз!

ТУЬШ ХЬУНИН КИЧI

Эхирни чи вил галай йиф алукьна,

Ада кьилиз акъудна чи мурадар:

Гьалтдалди чи рикIевай кичI кьулухъна,

Шадвал хъваз таз зи рикIив а арада.

Жузунна за: «Йиф, им керчек кар яни:

Ярди темен гана заз, зав агатна?»

Лагьана заз: «Къужахда яхъ яр на ви! –

Къакъатунин тIурфандай чун акъатна…»

Ашукь касди табдач – адан гафар тир

РикIин къеняй атанвайбур куькIвена…

Зи къужахда яр чирагъдиз ухшар тир,

Легьзедилай чун ялавдиз элкъвена.

МАРФ

Баркаван марф! Кьунвай михьиз датIана

Зи туьнт руьгьдин деринар терс кьурагьди.

Зи ашкъидин ярари ам дигана –

Мани яна ана къайнар булахди.

Кьве рикIикай садаз муькуь рикIин тIал

Таквадайла, а булахди ргазвай

Садлагьана кьатIна сефилвилин гъал,

Къариблухда гъерикI зи рикI цукьазвай.

А булах заз са хъвер хьиз я яд чилел,

Ана куьлуь хъверни рикIиз дарман я!

Эгер къе икI аватIа зун шадвиле,

Ви хъвер я зи руьгь дигайди, ви ван я.

Вун я вири пашманвилин мусибат

Чукурайди жаздан хьанвай зи чандай.

Залзала хьиз я ви хъвер заз, муьгьуьббат

ЦIийи хъувур, умуд хгуз кьакьандай.