Рушанни сусан гьуьжет

Са рушани суса гьуьжет ийизва.

Свас рахазва: «Къенин майдан зиди я».

Рушан гафар: «Зун хунча я кIевизмай,

Гатфарин вахт, цуьквер суван зиди я».

Свас рахазва: «Захъ уьрдег, захъ къаз ава,

Эцигна хьиз хурал, ядай саз ава,

Лазимбуруз гудай нямет-наз ава,

Авай вири эдеб-аркан[25] зиди я».

Руш: «Зун бахдиз ухшар тирди якъинда,

Зи хуруда къизил-мержан къалинда,

Гъил хкIамир – шамумаяр хъиткьинда,

Тазаз амай багъни бустан зиди я».

Свас: «Ша къвазин чун сад садан къвалалай,

Къуй килиграй чаз жегьилар яргъалай:

Гузвай суьгьуьр анарри зи хуралай,

Экв авай чин ацIай вацран зиди я».

Ни лугьузва, свас, вибур таб гафар я.

Заз куьн кьведни и дуьньядин гатфар я.

Виш чанни квез гудай Амрагь устIар я,

Анжах руша лугьуй: «Майдан зиди я».

Ашукь Шайда

(XVIII лагьай асир)

АШКЪИДИН ВАХТ

За лугьузвай и гафар

Кхьидай вун я дафтар.

Гьар жуьредин хуш рафтар

Авайдини вун я, яр.

Авуна сад садал туьш

Халикьди чун – жен таниш!

Лянет ийин, масанди,

Гьар са шери-шейтIандиз.

Фагьум ая хъсандиз:

И вахт гьар са инсандиз

Кеф чIугвадай заман я,

ЧIалал ша зи, аман я!

Са желе я муьгьуьббат,

Зи гафар я – михьи зат.

Эй гвайди гьар гьакъикъат,

Ийимир чаз мусибат.

Ахъайдайди вилер чи

Вун я, чIехи регьбер чи!

Ребби, за ваз ийин дад:

Вахт я, на заз це нубат,

Агуд тийиз хажалат,

Хуьдайвал ви аманат!

Вун сагьиб я виридан,

Хьайиданни жеридан.

Я Аллагь, я шейх Гьайдер[26],

Гзаф хьанва заз дердер.

Зазни ярдиз – са сефер,

Са рехъ це чаз лап иер.

Кьвед са рекье хъсан я,

Ажеб гуьзел заман я!