Помилуй мя, Боже, помилуй мя

Помилуй мя, Боже, помилуй мя.

Глаголы моя внуши, Господи, разумей звание мое. Вонми гласу моления моего, Царю мой и Боже мой: яко к Тебе помолюся, Господи. Заутра услыши глас мой: заутра предстану Ти, и узриши мя (Пс. 5, 2-4).

Помилуй мя, Боже, помилуй мя.

Господи, да не яростию Твоею обличиши мене, ниже гневом Твоим накажеши мене. Помилуй мя, Господи, яко немощен есмь: исцели мя, Господи, яко смятошася кости моя, и душа моя смятеся зело: и Ты, Господи, доколе; Обратися, Господи, избави душу мою, спаси мя ради милости Твоея: яко несть в смерти поминаяй Тебе, во аде же кто исповестся Тебе (Пс. 6, 2-6).

Помилуй мя, Боже, помилуй мя.

Воскресни, Господи Боже мой, да вознесется рука Твоя, не забуди убогих Твоих до конца
(Пс. 9, 33).

Помилуй мя, Боже, помилуй мя.

Ты, Господи, сохраниши ны и соблюдеши ны от рода сего и во век (Пс. 11, 8).

Помилуй мя, Боже, помилуй мя.

Призри, услыши мя, Господи Боже мой, просвети очи мои, да не когда усну в смерть: да не когда речет враг мой: укрепихся на него. Стужающии ми возра­дуются, аще подвижуся. Аз же на милость Твою уповах: возрадуется сердце мое о спасении Твоем: вос­пою Господеви благодеявшему мне, и пою имени Господа вышняго

(Пс. 12, 4-7).

Помилуй мя, Боже, помилуй мя.

Соверши стопы моя во стезях Твоих, да не подвижутся стопы моя (Пс. 16, 5).

Помилуй мя, Боже, помилуй мя.

Удиви милости Твоя, спасаяй уповающыя на Тя от противящихся деснице Твоей: сохрани мя Господи, яко зеницу ока: в крове крилу Твоею покрыеши мя от лица нечестивых острастших мя: врази мои душу мою одержаша тук свой затвориша: уста их глаголаша гордыню. Изгонящии мя ныне обыдоша мя, очи свои возложиша уклонити на землю. Объяша мя, яко лев готов на лов и яко скимен обитаяй в тайных. Воскресни, Господи, предвари я и запни им: избави душу мою от нечестиваго, оружие Твое от враг руки Твоея (Пс. 16, 7-14).

Помилуй мя, Боже, помилуй мя.

Грехопадения кто разумеет; от тайных моих очисти мя, и от чуждих пощади раба Твоего

(Пс. 18, I3-I4).

Помилуй мя, Боже, помилуй мя.

Ты же во святем живеши, хвало Исраилева. На Тя уповаша отцы наши: уповаша, и избавил еси я: к Тебе воззваша, и спасошася: на Тя уповаша, и не постыдешася

(Пс, 21, 4-6).

Помилуй мя, Боже, помилуй мя.

Да не отступиши от мене, яко скорбь близ, яко несть помогаяй ми (Пс.21, 12).

Помилуй мя, Боже, помилуй мя.

Ты же, Господи, не удали помощь Твою от мене: на заступление мое вонми. Избави от оружия душу мою, и из руки песии единородную мою. Спаси мя от уст Львовых, и от рог единорожь смирение мое (Пс. 21, 20-22).

Помилуй мя, Боже, помилуй мя.

Помяни щедроты Твоя, Господи, и милости Твоя, яко от века суть. Грех юности моея и неведения моего не помяни: по милости Твоей помяни мя Ты, ради благости Твоея, Господи (Пс. 24, 6-7).

Помилуй мя, Боже, помилуй мя.

Скорби сердца моего умножишася, от нужд моих изведи мя. Виждь смирение мое и труд мой, и остави вся грехи моя. Виждь враги моя, яко умножи­шася (Пс. 24, 17-19).

Помилуй мя, Боже, помилуй мя.

Сохрани душу мою и избави мя, да не постыжуся, яко уповах на Тя (Пс. 24, 20).

Помилуй мя, Боже, помилуй мя.

Услыши, Господи, глас мой, имже воззвах, поми­луй мя и услыши мя. Тебе рече сердце мое: Господа, взыщу, взыска Тебе лице мое: лица Твоего, Господи, взыщу. Не отврати лица Твоего от мене и не уклонися гневом От раба Твоего: Помощник мой буди, не отрини мене и не остави мене, Боже, Спасителю мой. Яко отец мой и мати моя остависта мя, Господь же восприят мя. Законоположи ми, Господи, в пути Тво­ем, и настави мя на стезю правую враг моих ради. Не предаждь мене в душы стужающих ми: яко восташа на мя свидетеле неправеднии, и солга неправда себе. Верую видети благая Господня на земли жи­вых. Потерпи Господа, мужайся, и да крепится серд­це твое, и потерпи Господа (Пс. 26, 7-14).

Помилуй мя, Боже, помилуй мя.

На Тя, Господи, уповах, да не постыжуся во век: правдою Твоею избави мя, и изми мя. Приклони ко мне ухо Твое, ускори изъяти мя: Буди ми в Бога за­щитителя и в дом прибежища, еже спасти мя. Яко держава моя и прибежище мое еси Ты: и имене Твое­го ради наставший мя и препитаеши мя. Изведеши мя от сети сея, юже скрыта ми: яко Ты еси защититель мой, Господи. В руце Твои предложу дух мой: избавил мя еси, Господи, Боже истины. Возненави­дел еси хранящыя суеты вотще: аз же на Господа уповах. Возрадуюся и возвеселюся о милости Тво­ей, яко призрел еси на смирение мое, спасл еси от нужд душу мою (Пс. 30, 1-8).

Помилуй мя, Боже, помилуй мя.

К Тебе, Господи, воззову, Боже мой: да не премолчиши от мене: да не когда премолчиши от мене, и уподоблюся низходящым в ров. Услыши, Госпо­ди, глас моления моего, внегда молитимися к Тебе, внегда воздети ми руце мои ко храму святому Твое­му. Не привлецы мене со грешники, и с делающими неправду не погуби мене, глаголющими мир с ближ­ними своими, злая же в сердцах своих (Пс.27, 1-3)

Помилуй мя, Боже, помилуй мя.

Просвети лице Твое на раба Твоего: спаси мя милостию Твоею. Господи, да не постыжуся, яко призвах Тя (Пс. 30, 17-18).

Помилуй мя, Боже, помилуй мя.

Ты еси прибежище мое от скорби обдержащия мя: Радосте моя, избави мя от обышедших мя (Пс.31, 7).

Помилуй мя, Боже, помилуй мя.

Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего. Пострадах и слякохся до конца, весь день сетуя хождах (Пс. 37, 5-7).

Помилуй мя, Боже, помилуй мя.

Господи, пред Тобою все желание мое, и возды­хание мое от Тебе не утаися. Сердце мое смятеся, остави мя сила моя, и свет очию моею, и той несть со мною (Пс.37, 10-11).

Помилуй мя, Боже, помилуй мя.

Не остави мене, Господи Боже мой, не отступи от мене: вонми в помощь мою, Господи спасения моего (Пс. 37, 22-23).

Помилуй мя, Боже, помилуй мя.
Яко одержаша мя злая, имже несть числа: постигоша мя беззакония моя, и не возмогох зрети: умножишася паче влас главы моея, и сердце мое остави мя. Благоволи, Господи, избавити мя: Гос­поди, во еже помощи ми, вонми. Да постыдятся и посрамятся вкупе ищущий душу мою, изъята ю: да возвратятся вспять и постыдятся хотящий ми злая. Да возрадуются и возвеселятся о Тебе вси ищущий Тебе, Господи, и да рекут выну, да возвеличится Господь, любящий спасение Твое. Аз же нищ есмь и убог, Господь попечется о мне: По­мощник и Защититель мой еси ты, Боже мой, не закосни

(Пс. 39, 13-15, 17-18).

Помилуй мя, Боже, помилуй мя.
Услыши ны, Боже, Спасителю наш, упование всех концей земли и сущих в мори далече (Пс 64, 6).

Помилуй мя, Боже, помилуй мя.
Боже, ущедри ны и благослови ны, просвети лице Твое на ны и помилуй ны (Пс.66, 2).

Помилуй мя, Боже, помилуй мя.

Спаси мя, Боже, яко внидоша воды до души моея. Углебох в тимении глубины, и несть постояния: приидох во глубины морския, и буря пото­пи мя

(Пс. 68, 2-3).

Помилуй мя, Боже, помилуй мя.

Услыши мя, Господи, яко блага милость Твоя: по множеству щедрот Твоих призри на мя. Не от­врати лица Твоего от отрока Твоего, яко скорблю: скоро услыши мя. Вонми души моей и избави ю.

(Пс. 68, 17-19).

Помилуй мя, Боже, помилуй мя.

Не отвержи мене во время старости: внегда оскудевати крепости моей, не остави мене. Яко реша врази мои мне, и стрегущии душу мою совещаша вкупе, глаголюще: Бог оставил есть его, пожените и имите его, яко несть избавляли. Боже мой, не удалися от мене: Боже мой, в помощь мою вонми. Да постыдят­ся и изчезнут оклеветающии душу мою, да облекутся в студ и срам ищущий злая мне (Пс. 70, 9-13).

Помилуй мя, Боже, помилуй мя.

Что бо ми есть на Небеси; и от Тебе что восхотех на земли; Изчезе сердце мое и плоть моя, Боже сердца моего, и часть моя, Боже, во век (Пс. 72, 25-26).

Помилуй мя, Боже, помилуй мя.

Да не возвратится смиренный посрамлен: нищ и убог восхвалита имя Твое. Востани, Боже, суди прю Твою: помяни поношение Твое, еже от безумнаго весь день. Не забуди гласа молитвенник Твоих: гор­дыня ненавидящих Тя взыде выну

(Пс. 73, 21-23).

Помилуй мя, Боже, помилуй мя.

Не помяни наших беззаконий первых: скоро да предварят ны щедроты Твоя, Господи, яко обнищахом зело. Помози нам, Боже, Спасителю наш, славы ради имене Твоего: Господи, избави ны и очисти гре­хи наша имене ради Твоего (Пс. 78, 8-9).

Помилуй мя, Боже, помилуй мя.
Воздвигни силу Твою, и прииди во еже спасти нас. Боже, обрати ны, и просвети лице Твое, и спасемся (Пс. 79, 3-4).

Помилуй мя, Боже, помилуй мя.
Благоволил еси, Господи, землю Твою, возвратил еси плен Иаковль. Оставил еси беззакония людий Твоих, покрыл еси вся грехи их. Укротил еси весь гнев Твой, возвратился еси от гнева ярости Твоея. Возврати нас, Боже спасений наших, и отврати ярость Твою от нас. Еда во веки прогневаешися на ны; или простреши гнев Твой от рода в род; Боже, Ты обращься оживиши ны, и людие Твои возвесе­лятся о Тебе. Яви нам, Господи, милость Твою, и спасение Твое даждь нам. Услышу, что речет о мне Господь Бог: яко речет мир на люди Своя, и на преподобныя Своя, и на обращающыя сердца к Нему

(Пс 84, 2-9).

Помилуй мя, Боже, помилуй мя.

Господи, Боже спасения моего, во дни воззвах и в нощи пред Тобою: да внидет пред Тя молитва моя: приклони ухо Твое к молению моему. Яко исполнися зол душа моя, и живот мой аду приближися (Пс. 87, 2-4).

Помилуй мя, Боже, помилуй мя.

Приклони, Господи, ухо Твое, и услыши мя: яко нищь и убог есмь аз (Пс. 85, 1)

Помилуй мя, Боже, помилуй мя.

Кто весть державу гнева Твоего, и от страха Твое­го ярость Твою изчести; Десницу Твою тако скажи ми, и окованныя сердцем в мудрости. Обратися, Господи, доколе; и умолен буди на рабы Твоя (Пс.89, 11-13).

Помилуй мя, Боже, помилуй мя.

Господи, услыши молитву мою, и вопль мой к Тебе да приидет. Не отврати лица Твоего от мене: в оньже аще день скорблю, приклони ко мне ухо Твое: в оньже аще день призову Тя, скоро услыши мя. Яко исчезоша яко дым дние мои, и кости моя яко сушило сосхошася (Пс. 101, 2-4).

Помилуй мя, Боже, помилуй мя. Открый очи мои, и уразумею чудеса от закона Твоего. Пришлец аз есмь на земли: не скрый от мене заповеди Твоя

(Пс. 118, 18-19).

Помилуй мя, Боже, помилуй мя.

Воздрема душа моя от уныния: утверди мя в словесех Твоих. Путь неправды отстави от мене и законом Твоим помилуй мя

(Пс. 118, 28-29).

Помилуй мя, Боже, помилуй мя.

Путь оправданий Твоих вразуми ми, и поглумлюся в чудесех Твоих (Пс. 118, 27).

Помилуй мя, Боже, помилуй мя.

Вразуми мя, и испытаю закон Твой и сохраню и всем сердцем моим. Настави мя на стези заповедей Твоих, яко тую восхотех. Приклони сердце мое во свидения Твоя, а не в лихоимство. Отврати очи мои еже не видети суеты: в пути Твоем живи мя. Постави рабу Твоему слово Твое в страх Твой. И да приидет на мя милость Твоя, Господи, спасение Твое пo словеси Твоему

(Пс. 118, 34-38, 41).

Помилуй мя, Боже, помилуй мя.

Помолихся лицу Твоему всем сердцем моим: по­милуй мя по словеси Твоему. Милости Твоея, Гос­поди, исполнь земля, оправданием Твоим научи мя

(Пс. 118, 58, 64).

Помилуй мя, Боже, помилуй мя.

Благости и наказанию и разуму научи мя, яко заповедем Твоим веровах (Пс. 118, 66).

Помилуй мя, Боже, помилуй мя.

Благ еси Ты, Господи: и благостию Твоею научи мя оправданием Твоим (Пс. 118, 68).

Помилуй мя, Боже, помилуй мя.

Руце Твои сотвористе мя и создаете мя: вразуми мя, и научуся заповедем Твоим

(Пс. 118, 73).

Помилуй мя, Боже, помилуй мя.

Буди же милость Твоя, да утешит мя, по слове­си Твоему рабу Твоему: да приидут мне щедроты Твоя, и жив буду, яко закон Твой поучение мое есть

(Пс. 118, 76-77).

Помилуй мя, Боже, помилуй мя. Буди сердце мое непорочно во оправданиях Тво­их, яко да не постыжуся (Пс. 118, 80).

Помилуй мя, Боже, помилуй мя.

Твой есмь аз, спаси мя: яко оправданий Твоих взысках

(Пс. 118, 94).
Помилуй мя, Боже, помилуй мя.

Заступи мя по словеси Твоему, и жив буду: и не посрами мене от чаяния моего: помози ми, и спасуся, и поучуся во оправданиих Твоих выну (Пс. 118, 116-117).

Помилуй мя, Боже, помилуй мя.

Призри на мя, и помилуй мя, по суду любящих имя Твое. Стопы моя направи по словеси Твоему, и да не обладает мною всякое беззаконие: избави мя от клеветы человеческия, и сохраню заповеди Твоя. Лице Твое просвети на раба Твоего и научи мя оп­равданием Твоим (Пс. 118, 132-135).

Помилуй мя, Боже, помилуй мя.

Воззвах всем сердцем моим, услыши мя, Госпо­ди: оправдания Твоя взыщу. Воззвах Ти, спаси мя, и сохраню свидения Твоя. Глас мой услыши, Гос­поди, по милости Твоей: по судбе Твоей живи мя (Пс. 118, 145-146, 149).

Помилуй мя, Боже, помилуй мя.

Да приближится моление мое пред Тя, Господи: по словеси Твоему вразуми мя. Да внидет прошение мое пред Тя: Господи, по словеси Твоему избави мя. Отрыгнут устне мои пение, егда научиши мя оправ­данием Твоим. Провещает язык мой словеса Твоя, яко вся заповеди Твоя правда. Да будет рука Твоя еже спасти мя, яко заповеди Твоя изволих. Возжелах спасение Твое, Господи, и закон Твой поучение мое есть. Жива будет душа моя и восхвалит Тя: и судбы Твоя помогут мне. Заблудих яко овча погибшее: взыщи раба Твоего, яко заповедий Твоих не забых (Пс. 118, 169-176).

Помилуй мя, Боже, помилуй мя.

К Тебе возведох очи мои, Живущему на небеси (Пс. 122, 1).

Помилуй мя, Боже, помилуй мя.

Возврати, Господи, пленение наше, яко потоки югом

(Пс., 125, 4).

Помилуй мя, Боже, помилуй мя.

Из глубины воззвах к Тебе, Господи: Господи, услыши глас мой. Да будут уши Твои внемлюще гла­су моления моего. Аще беззакония назриши, Гос­поди, Господи, кто постоит; яко у Тебе очищение есть (Пс. 129, 1-3).

Помилуй мя, Боже, помилуй мя.

Помяни, Господи, Давида и всю кротость его. (Пс. 131, 1).

Помилуй мя, Боже, помилуй мя.
Господи, воззвах к Тебе, услыши мя: вонми гласу моления моего, внегда воззвати ми к Тебе. Да исправится молитва моя яко кадило пред Тобою: воздеяние руку моею, жертва вечерняя. Положи, Господи, хранение устом моим и дверь ограждения о устнах моих. Не уклони сердце мое в словеса лукавствия, непщевати вины о гресех с человеки делаю­щими беззаконие (Пс. 140, 1-4). Помилуй мя, Боже, помилуй мя.
Сохрани мя от сети, юже составиша ми, и от coблазн делающих беззаконие (Пс. 140, 9).

Помилуй мя, Боже, помилуй мя.

Гласом моим ко Господу воззвах, гласом моим ко Господу помолихся. Пролию пред Ним моление мое, печаль мою пред Ним возвещу (Пс. 141, 2-3).

Помилуй мя, Боже, помилуй мя.

Господи, услыши молитву мою, внуши моление мое во истине Твоей, услыши мя в правде Твоей: и не вниди в суд с рабом Твоим, яко не оправдится пред Тобою всяк живый. Яко погна враг душу мою: смирил есть в землю живот мой: посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои: душа моя яко земля безводная Тебе. Скоро услыши мя, Господи, изчезе дух мой: не отврати лица Твоего от мене, и уподоблюся низходящым в ров. Слышану сотвори мне За­утра милость Твою, яко на Тя уповах: скажи мне, Господи, путь, в оньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой: дух Твой Благий наставит мя на землю праву. Имене Твоего ради, Господи, живиши мя правдою Твоею: изведеши от печали душу мою: и милостию Твоею потребиши враги моя и погубиши вся стужающыя души моей: яко аз раб Твой есмь

(Пс. 142).

Помилуй мя, Боже, помилуй мя.
Услыши, Господи, очисти, Господи, вонми, Господи, и сотвори, и не закосни Тебе ради (Дан. 9, 19).

Это - почти целая, сокращенно изложенная Псалтирь, которая, по сказанию келейника святителя Тихона, была у него одною из особенно любимых священных книг. «Никогда и никуда, — замечает келейник, — он не хаживал и не езживал без Псалтири, но всегда имел оную за пазухою, ибо оная была маленькая, а наконец он и всю на па­мять читывал». Изведав собственным опытом целебную силу псалмочтения и псалмопения, святитель возымел прекрасную мысль: «для поощрения души своей унываю­щей и ближняго - к покаянию» составить из наиболее умилительных, покаянных псалмов нечто вроде особаго канона, разделив стихи покаянным припевом великаго канона: помилуй мя, Боже, помилуй мя.