Студопедия

Главная страница Случайная страница

КАТЕГОРИИ:

АвтомобилиАстрономияБиологияГеографияДом и садДругие языкиДругоеИнформатикаИсторияКультураЛитератураЛогикаМатематикаМедицинаМеталлургияМеханикаОбразованиеОхрана трудаПедагогикаПолитикаПравоПсихологияРелигияРиторикаСоциологияСпортСтроительствоТехнологияТуризмФизикаФилософияФинансыХимияЧерчениеЭкологияЭкономикаЭлектроника






Заз Нобелан премия гьикI ганай






 

Дагълух лезги хуьре зун зи са дустунин кIвале къурмишнавай суфрадихъ галай. Къецел къайи уьфтер язавай кьуьд алай. Фад мичIи хьанвай. Купlap кузвай пич авай утагъда ферикъатдиз и чIехи хзандин вири векилар, гьам чIехибур, гьам гъвечIибурни, санал ацукьнаваз, са касдини дарвал гьиссзавачир, хъсан, хуш ихтилатрал илигна, гьар са ацукьнавайда патав гвайбуруз вичин гьуьрмет ва агъайнавал къалурзавай, гьа са вахтунда жувахъ авай чирвилерни ва дуьньядин крарикай хабардар тирвални чуьнуьхзавачир, яни акъваз тавуна лагълагъзавай телевизордай гузвай хабарриз гьар сада вичин баянар гузвай.

И жуьреда ацукьуни, иллаки къвалариз яр акъатна кузвай ракьун пичини зи рикIел аял вахтар, хайи кIвал, жуван багърияр хкизвай ва зак зурба руьгь кутазвай. Заз акI тир хьи, исятда залай вуч кар ийиз кIан хьайитIани алакьда.

Дуьньядин ва уьлкведин гьаларикай ихтилатар куьтягь хьана, гила суьгьбетар чкадин вакъиайрикай, къунши хуьрерикай ва чидай ксарикай физвай. Къунши хуьруьз Урусатдин яргъал шегьерда яшамиш жезвай зи са дуст ватандал кьил чIугваз хтанва лагьай хабарди зи хвешивал ирид цавариз акъудна.

– Ам пакамахъ хъфинни мумкин я, – лагьана кIвалин иесидин хци. (Ам духтур тир, иллаки хъуьтIуьн вахтунда медпунктар авачир хуьрерай тир азарлуйрин патав тади гьалда эверун себеб яз, ам анриз мукьвал-мукьвал физвай ва адаз гьина вучтин цIийи хабарар аватIа чизвай).

– АкI хьайила, ам къе акуна кIанда! – кьетIидаказ ла-гьана за.

– За тухуда вун! – викIегьдиз жаваб гана гьамиша тади куьмек гуз гьазур жегьилди.

– Йифен рекьиз экъечIун хаталу я. Пакамахъ, экв ачух хьайила, алад, – сабурлудаказ рахана кIвалин иеси ва заз килигна.

Зи хванахвадиз за кьулухъ чIугуна кIанзавай. Адан гьуьрметдай за гьакI авунни лазим тир, амма за жуван мугьманвилин гегьенш ихтияррикай тежедай кьван гзаф менфят хкудна, вучиз лагьайтIа заз чун къунши хуьруьз яхдиз фидай хьиз авай.

– Фена кIанда, чан хванахваI Яргъал йисара тахкунвай дустунихъ вил хьанва.

– Ихтияр види я, – рухсат гана чаз дустунихъ вил хьун вуч ятIа чизвай зи амадагди. – Анжах мукъаят хьухь. Рехъ йифенди я, хъуьтIуьнди я.

Жегьил духтурди вичин кьве чархун мотоцикл худда турла, за рекьиз экъечIун рикIел гъана лугьуз гьайифни чIугуна. Амма дустунихъ цIигел хьунухьин хура я хъуьтIуьвайни, я йифевайни, я мурк авай рекьивайни акъваз жедачир.

Чун рекье гьатна.

Кьуд патавай кьакьан дагълар, вири чуьллер, рекьер, живедик кваз, са ранг тир. Цавун юкьвал алай ацIай вацра зурба чинидин къапуниз ухшар хьанвай дере къалиндиз экуьнив ацIурнавай. КукIушрини къаяйри цIарцIар гузвай. Мотоциклдин фарадин икьи нур алтад жезвай тик рекьини рапрапар гузвай, вучиз лагьайтIа ам хъсандиз таптагъ хьанвай муркIади кьунвай. Амма духтур гада (адан къене ички авачизни тушир) гзаф мягькем ва мукъаят тир. Идалайни гъейри, адаз и рекьер хуралай чир хьанвай, акI тир хьи, и рекьерини, и гададини, адан мотоциклдини, фадлай сад садан аманевияр хьанваз, чпи чеб хуьзва, сад садан гъавурда ава.

Хуьруьв агакьайла, саки вири кIвалер ксанвай. Зи жегьил дустуниз зи куьгьне дустунин кIвалер алай чка чизвачир. Зи рикIелни и чкаяр бегьемдиз аламачир, вучиз лагьайтIа хуьр дегиш хьанвай, зунни иниз ахкъат тавуна гзаф йисар тир.

Хуьруьн къерехда авай са айвандик экв куькIвена. Якъин хьи, ам чи мотоциклдин ван хьана куькIуьрайди я.

Айвандик са итим экъечIнавай.

– Яда, вун вуж я? – гьарайна за.

– Зун Нобель я, – жаваб гана заз. – Вун вуж я? Хийир-хабар? Ваз вуч кIанзавайди я?

За зи тIвар лагьана. Адан чи патар патал ажайиб ва дуьньяда машгьур тIварцIи шадарнаваз ва зак зарафатар ийиз кIан хьунин квал кутунваз, за алава хъувуна:

– Нобелан премия кIанз атанвайди я.

Ам зи зарафатдин гьавурда акьунвай, адалайни гъейри, адаз зи тIвар идалай вилик ван хьанвай ва адаз зун гьи пешедин иеси ятIа чизвай. Ада заз, вичин куьгьне танишдиз хьиз, теклифна:

– АкI ятIа, ша хкаж хьухь кIвализ!

– Ваъ, ваъ, пара кьван сагърай, кIвал-югъ къени хьурай. Чаз маса дердияр ава. Ви куьмек герек я, – за адавай зи куьгьне дустунин кIвалерал гьикI фидатIа къалурун тIалабна.

– Зи кIвализ илиф тавунмаз, за ваз са гафни лугьудач. Хкаж хьухь!

– Йиф я... Геж я…– багьнаяр жагъуриз алахъна зун.

– Заз абур чидай гафар туш! – кIвалин иеси куьчедал эвичIна. – Я хкаж хьухь, я атайвал ахлад.

Ада зун дуст такуна техъфидайди гьисснавай.

Заз маса чара амукьнач: жуваз лагьайвал авуна.

Нобела гьа йифиз зи дустунизни (абур кьведни талукь миресар яз хьана), маса чпин мукьва-кьилийризни эверна, хуьруьн зуьрнечиярни далдамчи гъана, йифди зурба дем къурмишна.

Пакамахъ чун элкъвена хкведайла, адаз сагълугъдин ва алхишдин гафар лагьайдалай кьулухъ за адаз зи суални хгана:

– Гила завай зун Нобелан премиядин лауреат я лагьайтIа жеда, тушни?

– Эхь, эхь! – такабурдиз жаваб гана халис дагъвиди. –Лайихлубур хьайитIа, мад ракъура!


Поделиться с друзьями:

mylektsii.su - Мои Лекции - 2015-2024 год. (0.006 сек.)Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав Пожаловаться на материал